Jumyspen qamtý baǵdarlamasynyń birqatar baǵytynda jumsalǵan qarjy ózin-ózi aqtaǵan joq - G. Qaraǵusova
Búgin Parlament Májilisinde «Qazaqstan Respýblıkasy Úkimetiniń turaqty ekonomıkalyq ósýdi jáne jumyspen qamtýdy qamtamasyz etý úshin daǵdarysqa den qoıý sharalary» taqyrybyndaǵy Úkimet saǵatynda depýtat Gúljan Qaraǵusova osylaı málim etti.
Depýtattyń aıtýynsha, álemdik daǵdarystyń jaǵymsyz qubylystarynyń biri jumyssyzdyqtyń joǵary deńgeıi bolyp tabylady. Bul rette elimizde memlekettik jáne salalyq baǵdarlamalar iske asyp jatqanyna toqtalǵan Gúljan Qaraǵusova, ekonomıka ósimimen qatar jańa jumys oryndaryn qurýdyń mańyzdylyǵyn atap óte kele, «Jumyspen qamtý-2020» baǵdarlamasyna toqtaldy. «Osy baǵdarlamany júzege asyrýdyń tıimdiligi qarajatty nysanaly paıdalaný turǵysynan emes, naqty jumyspen qamtylý deńgeıinen baǵalanýy shart. Máselen, 2012 jyly baǵdarlamaǵa 102 myń 800 adam qatysyp, 92 myń 500 adam jumysqa ornalasty. 63 myń 200 adam jańa kásip ıesi atandy. Shaǵyn nesıe alyp, óz isin keńeıtkender - 6 myń 500 qatysýshy. Al 2 myń 500 adam óz otbasylarymen birge ekonomıkalyq ósim núktesine kóship baryp, jańa oryndarda jumysqa aralasqan», - dedi G. Qaraǵusova.
Sonymen qatar, depýtat bir jyl ishinde 281 myń 500 jańa jumys orny ashylǵanyn, onyń ishinde aýyldaǵysy 128 myń 600-di quraıtynyna nazar aýdardy.
«Jumyspen qamtý baǵdarlamasy aıasynda bólingen qarajat paıdalanyldy, sandar áserli, kórsetkishter oń, alaıda bul sandardyń artynda ne tur? Bul baǵytta álgi mamandardyń naqty bir óńirde, qala men aýdanda suranysqa ıe bolatyndyǵy esepke alyndy ma? Eger naqty oqytylǵan soń jumyssyzdardy eńbekpen qamtý turǵysynan alsaq, jaǵdaı máz emes ekeni ańǵarylady. Máselen, 2012 jyly oqýdy aıaqtaǵan 28 myń 24 adamnan turaqty jumys ornyn tapqandary 21 myń 11 adamdy nemese 74,9 paıyzdy quraıdy. Al bul degenińiz baǵdarlama oqytý arqyly jumyssyzdardy ornalastyrý baǵytynda tórtten bir bóligine qatysty maqsatyna qol jetkize almady, nemese jumsalǵan qarajat ózin-ózi aqtamady degen sóz», - dedi G. Qaraǵusova.