Jumyspen qamtý baǵdarlamasy sheńberinde 14 myń adam perspektıvasy joǵary óńirge kóshirýge daıarlanady
ASTANA. 16 mamyr. QazAqparat /Qanat Mámetqazyuly/ - Elbasy Joldaýynda aıtylǵan jumyspen qamtýdyń jańa baǵdarlamasy sheńberinde 14 myń adam perspektıvasy joǵary óńirge kóshirýge daıarlanady. Búgin QR Parlamenti Májilisiniń Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
Mınıstrdiń aıtýynsha, jańa baǵdarlamanyń negizgi baǵyttarynyń biri eńbek resýrstarynyń jumyldyrylýyn arttyrýǵa járdemdesetin bolady. Bul rette jumysqa ornalasýǵa nemese óz kásibin ashýǵa sol óńirdiń perspektıvasy bolmasa, onda baǵdarlama aıasynda memleket asa damyǵan óńirlerge jurttyń kóship barýyna múmkindikterdi qarastyrady.
«Bizdiń memleket úshin ýrbanızatsııa qashyp qutylatyn qubylys emes. Qazirdiń ózinde depressııalyq, perspektıvasy tómen dep sanalatyn óńirlerdi anyqtaý bastalǵan. Dál osyndaı óńirlerden birinshi kezekte ishki oblystyq jáne aýdandyq baǵytta azamattardy kóshirý jumystary qamtylmaq. Aǵymdaǵy jyly shamamen 14 myń adam osy sharaǵa daıarlanatyn bolady dep sanaımyz», - deıdi Gúlshara Naýshaqyzy. Onyń aıtýynsha, ekonomıkalyq áleýeti tómen eldi mekenderdi anyqtaý Ekonomıkalyq damý jáne saýda mınıstrligi jáne Aýyl sharýashylyǵy mınıstrligimen birlese júrgiziletin bolady. Áıtse de negizgi usynysty jergilikti atqarýshy organ jasaýy tıis.
