Jumyspen qamtý baǵdarlamasy aıasynda sońǵy eki jylda bólingen mıkrokredıt bes esege artty - S. Ábdenov
Bul týraly búgin Májilistegi Úkimet saǵatynda Eńbek jáne halyqty áleýmettik qorǵaý mınıstri Serik Ábdenov málim etti.
Mınıstrdiń aıtýynsha, jurtshylyqty mıkrokredıtpen qamtamasyz etý aýyldyq jerlerde jumyssyzdar sanyn azaıtýǵa, ózin ózi jumyspen qamtýshylardyń ónimdiligin arttyrýǵa septigin tıgizetin bolady. Bul rette kredıttiń basym bóligi mal jáne ósimdik sharýashylyǵyna tıesili bolyp otyr. Máselen, bul barlyq bólingen nesıeniń 77 paıyzyn quraıdy. Al jobalardyń 23 paıyzy qyzmet kórsetý, óńdeý salasyna tıesili bolyp tabylady.
«Sońǵy eki jylda bólingen mıkrokredıt qarajattary bes esege artty. Eger 2011 jyly 3,6 mlrd. teńge bólinse, 2013 jyly 16,9 mlrd. teńgeni qurady. Baǵdarlama qolǵa alynǵaly beri kásipkerlik negizderine 11 myńnan astam adam oqytyldy», dedi mınıstr S. Ábdenov.