«Jumyspen qamtý-2020» jol kartasyn júzege asyrý kezeńinde 200 myńnan astam qazaqstandyq jumyspen qamtyldy - QR DSÁDM

ASTANA. QazAqparat - Qazaqstanda 2011-2015 jyldar aralyǵynda «Jumyspen qamtý 2020 jol kartasy» baǵdarlamasyn júzege asyrý aıasynda bos oryndarǵa 222,5 myń adam jumysqa ornalastyryldy, dep habarlady www.primeminister.kz QR Densaýlyq saqtaý jáne áleýmettik damý mınıstrligine silteme jasap.

Sonymen qatar, vedomstvonyń málimetinshe, «Jumyspen qamtý 2020» baǵdarlamasynyń aıasynda 34,7 myń qazaqstandyq kásipkerlik negizderine oqytýdan ótip, óz isterin uıymdastyrý úshin mıkrokredıt aldy.

Jastar praktıkasyna 80,8 myń, memleket sýbsıdııalaıtyn áleýmettik jumys oryndaryna 103,1 myń adam jiberilip, kásibı oqytý, biliktilikti arttyrý men qaıta daıarlaýdan 122,9 myń azamat ótti.

Esterińizge sala keteıik, 2015 jyly QR DSÁDM mamandary Memleket basshysynyń jumyssyzdyqqa jol bermeý boıynsha berilgen tapsyrmasyn oryndaý maqsatynda «Jumyspen qamtý 2020 jol kartasy» baǵdarlamasyn jandandyrý jumystaryn júrgizdi. Ótken jyldyń 8 jeltoqsanynda QR Úkimeti jumys oryndaryn qurý men saqtaýǵa negizdelgen «JQJK 2020» baǵdarlamasyna engizilgen túzetýlerdi maquldady.

«Kásiporyndarda joǵary bilikti mamandardyń jumys oryndaryn saqtaý maqsatynda jumys ýaqytynyń qysqarýyna baılanysty eńbekaqynyń 2/3 bóligin ýaqytsha sýbsıdııalaý tetikteri engiziledi. Sonymen birge, kásiporyn jumys ornyn saqtaǵan jaǵdaıda, qyzmetkerlerdi, onyń ishinde jumys isteıtin jastardy jumys berýshiler tarapynan qosa qarjylandyrýmen nemese, tolyq memleket esebinen oqytýdy uıymdastyrý qarastyrylady», - delingen mınıstrlik habarlamasynda.

Budan ózge, qosymsha jumys oryndaryn qurý úshin «JQJK 2020» aıasynda qoldanylatyn kelesi quraldardy: ınfraqurylymdyq jobalarǵa jumysqa ornalastyrý, barlyq memlekettik, salalyq jáne óńirlik baǵdarlamalar sheńberinde iske asyrylatyn jobalardyń múmkindikterin qoldaný jáne kásipkerlikti damytý úshin mıkronesıe berý kúsheıtiletin bolady.