«Jumyspen qamtý-2020» jáne «Aq bulaq» baǵdarlamalarynda sybaılas jemqorlyqtyń eń joǵary kórsetkishi tirkelgen
ASTANA. 10 qyrkúıek. QazAqparat - Memlekettik baǵdarlamalardy iske asyrý barysynda qylmys jasady degen aıyppen jyl basynan beri 13 adam sottaldy. Bul týraly búgin Ekonomıkalyq qylmysqa jáne sybaılas jemqorlyqqa qarsy agenttiginiń sybaılas jemqorlyqqa jáne kóleńkeli ekonomıkaǵa qarsy qoǵamdyq keńesiniń otyrysynda Sybaılas jemqorlyq týraly isterdi ashý jáne aldyn alý departamentiniń bastyǵy Marat Seksembaev málim etti.
Memlekettik baǵdarlamalar sheńberinde bólingen bıýdjettik qarajattardy urlaýmen kúresý baǵytyndaǵy jumysty aıta kele, M.Seksembaev birqatar ózekti máselelerge toqtaldy.
«Qarjy polıtsııasynyń aǵymdaǵy jyldyń 8 aıynda jasaǵan taldaýy kórsetkenindeı, bıýdjettik qarjynyń jumsalý máselesinde qatań baqylaýdyń joqtyǵy jemqor laýazymdy tulǵalarǵa jáne qylmystyq toptarǵa memlekettik baǵdarlamalarǵa bólingen qarajatty jymqyrýǵa múmkindik berip otyr. Máselen, bıylǵy jyldyń 8 aıynda bıýdjet salasyndaǵy sybaılas jemqorlyqtyń sany byltyrǵy jylmen salystyrǵanda 4 esege (53-ten 233-ke deıin) artqan», - dep atap ótti ol.
Onyń aıtýynsha, atalmysh baǵyttaǵy qylmystar barlyq oblystarda anyqtalǵan, sonyń ishinde Ońtústik Qazaqstan (62), Shyǵys Qazaqstan (34), Qostanaı (22), Aqtóbe (18), Qaraǵandy (16), Aqmola (14) jáne Soltústik Qazaqstan (14) oblystarynda eń kóp tirkelgen. Saldarynan memleketke 6 mlrd. teńgeden astam zalal keltirildi, bul 2012 jyldyń sáıkes kezeńimen salystyrǵanda 3 esege kóp. Anyqtalǵan qylmystardyń deni: óz qyzmetin asyra paıdalaný (97), laýazymdy jalǵandyq (87), ózge bireýdiń senip tapsyrylǵan múlkin jymqyrý nemese talan-tarajǵa salý (23), alaıaqtyq (12). Jaýapqa tartylǵan laýazymdy tulǵalardyń ishinde ákimdiktiń (100), ulttyq kompanııalardyń (6), mınıstrlikterdiń (3) qyzmetkerleri basym.
«Memlekettik baǵdarlamalardy iske asyrý barysynda qylmys jasady degen aıyppen jyl basynan beri 13 adam sottalǵan. Olar orta eseppen 2 jyl bas bostandyǵynan aıyrý jazasyna kesilgen. Anyqtalǵan qylmystardyń basym bóligi «Jumyspen qamtý-2020» (65 qylmys) jáne «Aq bulaq» baǵdarlamalaryna (45 qylmys) tıesili. Olardan keıin «Qoljetimdi baspana» - 24, «Agrobıznes» - 21, «Bıznestiń jol kartasy» - 13, «Balapan» - 10 keledi», - deıdi M.Seksembaev.
