«Jumyspen qamtý -2020» baǵdarlamasy qaıtadan qaralady
"Biz qazir óńirler boıynsha jumystan bosaǵandardyń kartasyn daıyndaýǵa kiristik. Bul jerde kásiporyndar jáne jumysshylardyń biliktilik sanatyna erekshe kóńil bólinedi,- dep habarlady aǵymdaǵy jyldyń 20 tamyzynda Ortalyq kommýnıkatsııalar qyzmetindegi baspasóz máslıhatynda Premer-Mınıstrdiń birinshi orynbasary Baqytjan Saǵyntaev. Onyń aıtýynsha, árbir kásiporyndaǵy bilikti mamandy saqtap qalý úshin, Úkimet pen jergilikti ákimdikter birqatar qoldaý sharalaryn iske asyrady. - Eger de bilikti jumysshynyń jumys ýaqyty tańǵy 08-den keshki 18-ge deıin eseptelse, biz onyń joǵaltqan eki saǵatyna aqsha tóleımiz. Sondaı-aq, «Jumyspen qamtý 2020» baǵdarlamasy aıasynda bilikti jumysshylarǵa arnaıy grant bólinedi. Bul grant jumys berýshilerge bilikti mamandardy qaıta oqytýǵa, biliktiligin odan ári kóterýge múmkindik beredi. Atap aıtqanda, granttyń 80 paıyzyn memleket, 20 paıyzyn jumys berýshiniń ózi tóleıdi",- dep túsindirdi B. Saǵyntaev.
Daǵdarys kezeńinde memleket jastardy da qoldaýsyz qaldyrmaıdy. Atalǵan baǵdarlama sheńberinde, Úkimet 18-ben 24 jas aralyǵyndaǵy jastardy oqýǵa jiberedi. Eń mańyzdysy, oqý kezeńinde barlyq jastardyń jumys oryndary tolyq saqtalady. Premer-Mınıstrdiń birinshi orynbasarynyń aıtýynsha, biliktiligi tómen qarapaıym jumysshylar da nazardan tys qalmaıdy. Mysaly, olar bir jerden jumystan bosatylsa, onda memlekettik baǵdarlamalar boıynsha basqa jerde jańadan ashylatyn jumys oryndaryna ornalasýǵa quqyly bolmaq. ıAǵnı, osylaısha Qazaqstan Úkimeti jumyssyzdyqqa jol bermeý sharalaryn iske asyrady.
Aıta ketelik, «Jumyspen qamtý 2020» baǵdarlamasy - bul sońǵy 8 jylda óziniń ómirsheńdigin, tıimdiligin dáleldegen baǵdarlama. Densaýlyq saqtaý jáne áleýmettik damý mınıstrliginen alynǵan málimetterge súıensek, 2015 jyldyń 1 qańtarynan beri atalǵan baǵdarlama aıasynda 82 myńǵa jýyq adam jumysqa ornalasqan. Sonyń ishinde, 63 myń adam - turaqty jumys oryndaryn, 18,8 myń adam - ýaqytsha jumys oryndaryn tapqan. Mysaly, jyl basynan beri 13,8 myń adam kásibı oqýǵa, 7,7 myń adam jastar tájirıbesi boıynsha biliktiligin kóterýge jiberilgen. Sondaı-aq, 8,2 myń adam áleýmettik jumys oryndarymen qamtamasyz etilgen.
Baǵdarlamanyń ómirsheńdigin birneshe baǵyttan baıqaýǵa bolady. Sonyń biri - kásipkerlikke oqytý. 2015 jyldyń basynan beri elimizdegi 2,2 myń adam kásipkerlik negizderinen dáris alyp, sonyń ishindegi 1377-si óz ómirinde alǵash ret kásip ashypty. Al dáris tyńdaǵan 2,2 myń adamnyń 2 myńy 4,8 mlrd. teńgege memleketten nesıe alyp, jeke kásippen aınalysýǵa táýekel etken. Atap aıtarlyǵy, qazirgi kezde shalǵaı aýyldardaǵy 21 myńnan astam qazaqstandyqtar «Jumyspen qamtý 2020» baǵdarlamasyna qatysýǵa nıet bildirip otyr. Qoryta aıtsaq, osy baǵdarlama júzege asyrylǵannan beri Qazaqstandaǵy 461 myń adam ózine jumys tapqan. Sonyń ishinde 60 paıyzy - jumyssyzdar, 30 paıyzy - ózin-ózi jumyspen qamtýshylar, 9 paıyzy - eńbekke jaramdy áleýmettik ahýaly tómen azamattar. Demek, munyń ózi el Úkimetiniń batyl, aldyn-ala oılastyrylǵan sheshimi daǵdaryspen kúrestegi tıimdi qarý ekenin dáleldeýde.
Ámirlan Álimjan