«Jumyspen qamtý- 2020» baǵdarlamasy boıynsha І toqsanda 17 myń adam jumyspen qamtyldy

ASTANA. 5 mamyr. QazAqparat - Qazaqstanda 2011 jyldan bastap qazaqstandyqtardy jumyspen turaqty jáne nátıjeli qamtýǵa járdemdesý arqyly halyqtyń tabysyn arttyrýǵa baǵyttalǵan  «Jumyspen qamtý-2020» baǵdarlamasy iske asyrylýda, dep habarlady pm.kz saıty.

Eńbek jáne halyqty áleýmettik qorǵaý mınıstrliginiń aqparaty boıynsha,  2012 jyldyń qańtar-naýryz aılarynda «Jumyspen qamtý-2020»  baǵdarlamasyna qatysýǵa barlyq aımaqtyq ýákiletti organdarǵa 26,4 myń adam ótinish jasaǵan jáne onyń 19,7 myńy nemese 75 paıyzy áleýmettik kelisimshartqa otyrdy.

Oǵan qosa, atalǵan kezeńde 17 myń adam jumysqa ornalastyryldy, onyń ishinde 10,6 myń adam  nemese 62,4 paıyzy Baǵdarlama  arqyly áleýmettik jumys oryndaryna jiberildi.

«Júgingenderdiń ishinde 2 myń adam nemese 11,8 paıyzy - bos  jumys oryndaryna, 2,4 myń adam nemese 14,2 paıyzy  - jastar tájırbıesine, 11,8 paıyzy nemese 2 myń adam  - oqýlaryn bitirgen soń  turaqty jumys oryndaryna jiberildi», - delingen Eńbek jáne  halyqty áleýmettik qorǵaý mınıstrliginen.

Baǵdarlamaǵa  qatysýǵa ótinish jasaǵandardyń sandyq úlesine keler bolsaq, Ońtústik Qazaqstan oblysynda - 7,9 myń  adam, Shyǵys Qazaqstanda  - 4 myń adam, Batys Qazaqstanda  - 1,9 myń adam, Jambyl oblysynda  -1,8  myń adam júgingen.

Vedomstvonyń málimeti boıynsha, áleýmettik kelisimsharttarǵa otyrǵandar boıynsha Ońtústik Qazaqstan, Shyǵys Qazaqstan, Jambyl, Qyzylorda jáne  Aqtóbe oblystarynda eń joǵary kórsetkish tirkelip otyr.

Jumyspen qamtýdyń belsendi saıasatyn júrgizý  Qazaqstan Respýblıkasynyń Úkimeti qyzmetiniń negizgi áleýmettik basymdyqtarynyń biri bolyp tabylady.  Jumyspen laıyqty qamtýdy qamtamasyz etý - halyqty áleýmettik qorǵaýdyń negizi, adam resýrstary áleýetin damytý jáne  iske asyrýdyń mańyzdy sharty, qoǵamdyq baılyqtyń artýy men ómir súrý sapasyn jaqsartýdyń basty quraly.