«Jumyspen qamtý-2020» baǵdarlamasy boıynsha 40 myńnan astam áleýmettik kelisimshartqa qol qoıyldy
Bıyl óziniń belsendi kezeńine aıaq basqan «Jumyspen qamtý-2020» baǵdarlamasy azamattardy jumyspen qamtýǵa qoldaý kórsetý arqyly elimizdiń eńbek áleýetin damytý jónindegi saıasatty jalǵastyrýǵa múmkindik berip otyr, - dep habarlady pm.kz saıty.
Eńbek jáne halyqty áleýmettik qorǵaý mınıstrliginiń aqparatyna súıensek, baǵdarlama iske asyryla bastaǵannan beri 40 myńnan astam adam áleýmettik kelisimshartqa otyrǵan. Jergilikti jumyspen qamtý organdary men baǵdarlamaǵa qatysýshylardyń arasynda jasalatyn kelisimniń bul túri taraptardyń áleýmettik jumystar usyný jáne olardy paıdalaný jónindegi ózara mindetterin qamtıdy.
Kelisimshartqa otyrǵandardyń barlyǵy baǵdarlamanyń qaıta oqytý, kásipkerlikti shaǵyn nesıelendirý, halyqtyń jınaqylyǵyn arttyrý sııaqty kómekterdi qamtyǵan baǵyttarǵa bólindi. Oǵan qosa, aǵymdaǵy jyly baǵdarlamanyń tórtinshi baǵyty - aýyldyq eldi mekenderdi damytý baǵyty qolǵa alynyp otyr.
Azamattardy qaıta oqytý jáne olardyń biliktilikterin jetildirý isin qamtyǵan І baǵyt boıynsha, 48 myń adam kásiptik oqýmen qamtyldy. Oqytý úderisine 442 bilim mekemesi atsalysty. 26 myń adam áleýmettik jumys oryndaryna jáne jastar tájirıbesine joldamalar aldy.
Aýyldaǵy kásipkerlikti damytýǵa negizdelgen ІІ baǵyt boıynsha 8151 adamdy nesıelendirý qarastyrylyp otyr. Baǵdarlama bastalǵaly shaǵyn nesıe alǵan qatysýshylardyń jalpy sany qazirgi tańda 1826 adamdy quraıdy.
Al eńbek resýrstarynyń jınaqylyǵyn arttyrýdy qarastyrǵan ІІІ baǵyttyń aıasynda 581 úıdiń qurylysy jalǵasýda, 314 úıdiń qurylysy aıaqtaldy. 2012 jylǵa josparlanǵan 229 úıdiń 30-nyń qurylysy aıaqtaldy, 174 úı boıynsha konkýrstyq jumystar júrgizilýde, 25 turǵyn úı salynyp jatyr.
Aýyldyq eldi mekenderdi damytýdy qarastyrǵan ІV baǵyttyń aıasynda áleýmettik-ekonomıkalyq damý áleýetteri orta nemese joǵary aýyldyq jerlerde ınfraqurylymdyq jobalardy iske asyrý jumystary qarastyrylýda. Bul baǵyttyń arqasynda aǵymdaǵy jyly aýyldarda 8 myń qosymsha jumys orny qurylmaq.
Qazaqstandyqtardy jumyspen qamtý elimizdiń eńbek jáne ekonomıkalyq áleýetiniń damý kepili bolyp tabylady. «Jumyspen qamtý-2020» baǵdarlamasyn odan ári jalǵastyrý Qazaqstannyń basymdyqty mindeti, respýblıka halqynyń eńbek belsendiligi men ál-aýqatyn arttyrýdyń negizi.