«Jumyspen qamtý - 2020» baǵdarlamasy aıasynda 8 myńnan astam aýyl azamaty shaǵyn nesıe aldy

ASTANA. 5 naýryz. QazAqparat - «Jumyspen qamtý - 2020» baǵdarlamasy aıasynda 8 myńnan astam aýyl azamaty shaǵyn nesıe aldy. Bul týraly búgin «Nur Otan» HDP-nyń saılaýaldy tuǵyrnamasynyń oryndalý máselesine arnalǵan Úkimettiń selektorlyq rejimdegi otyrysynda QR Eńbek jáne halyqty áleýmettik qorǵaý vıtse-mınıstri Tamara Dúısenova aıtty.

Onyń atap ótýinshe, «Jumyspen qamtý - 2020» baǵdarlamasyn iske asyrý kezeńinde respýblıkalyq bıýdjetten 95 mlrd. teńge qarajat bólingen. Al baǵdarlamaǵa 200 myńnan astam adam qatyssa, olardyń 30 paıyzyn búgingi tańda óz betinshe jumyspen qamtylǵan azamattar, al 69 paıyzyn jumyssyzdar qurap otyr.

«Baǵdarlamanyń birinshi baǵyty aıasynda 2 jyldyń ishinde 59 myńnan astam adam oqý ornyn aıaqtap, 38 myńnan astam adam jumysqa ornalasqan. Al ótken jyldyń ishinde 28 adam oqý ornyn támamdap, olardyń 80 paıyzy jumysqa ornalasty», - dedi ol.

Baǵdarlamanyń ekinshi baǵyty - aýylǵa shaǵyn nesıe berý máselesine qatysty aıtqan ol: «Bul baǵyt ózin ózi jumyspen qamtyǵan azamattardy jeke kásipkerlikke tartýdy kózdep qana qoımaı jańa jumys oryndaryn qurýǵa múmkindik beredi. Baǵdarlamany iske asyrý kezeńinde ótken jyly 8 myńnan astam adam nesıe alyp, 11 myń adam jańa kásipkerlik negizderin úırendi», - dedi.