Jumyskerler aldyndaǵy eń kóp qaryz Abaı oblysynda tirkelgen – mınıstrlik

ASTANA. QazAqparat – Elimizdiń 60 kásiporny jalaqy boıynsha qyzmetkerlerine 1,24 mlrd teńge qaryz. Bul týraly QR Eńbek jáne halyqty áleýmettik qorǵaý mınıstrligi, Eńbek, áleýmettik qorǵaý komıtetiniń tóraǵasy Tólegen Ospanqulov aıtty, dep habarlaıdy QazAqparat tilshisi.

«Jumyskerlerdiń eńbek quqyqtaryn qorǵaýdyń negizgi baǵyttarynyń biri – olardyń biliktiligine jáne eńbek sharttaryna saı keletin eńbekaqy tóleýdi qamtamasyz etý. Jalaqy boıynsha qaryz máseleleri mınıstrliktiń erekshe alańdaýshylyǵyn týǵyzady. Bıylǵy 14 qazandaǵy jaǵdaı boıynsha respýblıkanyń 60 kásiporny jalaqy boıynsha 1 821 qyzmetkerge 1,24 mlrd teńge somasynda qaryz. Jumyskerler aldyndaǵy eń kóp bereshek Abaı oblysynda – 218,7 mln teńge, Jetisý oblysynda – 22,9 mln teńge jáne Astana qalasynda – 19,3 mln teńge», - dedi T. Ospanqulov Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, jyl basynan beri jergilikti eńbek ınspektsııasy organdarynyń kómegimen jalaqy boıynsha 4,1 mlrd teńgege jýyq qaryz tólendi, sol arqyly 16,4 myń qyzmetkerdiń quqyqtary qorǵaldy.

«Eńbek mınıstrliginiń bastamasymen jalaqy boıynsha qaryzdy óteýdiń nátıjeliligin arttyrý maqsatynda zańnamaǵa ózgerister engizildi. Nátıjesinde jumys berýshiniń jalaqy tóleýi týraly nusqama beriledi. Nusqamanyń oryndalý merzimi aıaqtalǵannan keıin ol jeke sot oryndaýshylaryna májbúrlep oryndaý úshin jiberiledi. Bıyl 47 materıal berildi», - dedi Tólegen Ospanqulov.