Jumysqa jaramsyz qalǵan azamattardyń járdemaqysy qalaı ózgeredi

ASTANA. QazAqparat - QR Eńbek jáne xalyqty áleýmettik qorǵaý vıtse-mınıstri Svetlana Jaqypova eńbek etý qabiletinen aıyrylýǵa qatysty áleýmettik tólemniń qalaısha ózgeretinin túsindirdi. Atalǵan tólemder mindetti áleýmettik saqtandyrý qorynan berilip otyrady, dep xabarlaıdy QazAqparat tilshisi.

Vıtse-mınıstrdiń aıtýynsha, búginde eńbek etý qabiletinen aıyrylý boıynsha áleýmettik saqtandyrý qorynan beriletin tólemaqynyń mólsheri 22 988 teńgeni quraıdy. Al jańa júıe aıasynda atalǵan tólem 32,5 paıyzǵa artady.
«Mysaly, adamnyń ortasha aılyq tabysy 100 myń teńgeni, al jalpy eńbek etý qabiletinen aıyrylý deńgeıi 65 paıyzdy jáne (qorǵa - avt.) qatysý ótili 85 aıdy quraıtyn júıege qatysýshy úshin jańa parametrlerdi eskergendegi tólem mólsheri 31 080 teńgeni quraıtyn bolady», - dedi S.Jaqypova búgin depýtattarǵa áleýmettik saqtandyrý máseleleri boıynsha keıbir zańnamalyq aktilerge ózgerister engizý týraly zań jobasyn tanystyrý kezinde.
Onyń sózine qaraǵanda, atalǵan tólemge múgedektigi boıynsha memlekettik áleýmettik járdemaqy tólemin qosý qajet.
«2019 jyly 2-shi toptaǵy múgedek úshin mólsher 45 438 teńgeni quraıdy. Sáıkesinshe, eki tólemniń jalpy somasy 76 518 teńgeni quraıtyn bolady», - dep atap kórsetti S.Jaqypova.
Aıta keteıik, búgin QR Eńbek jáne xalyqty áleýmettik qorǵaý mınıstrligi Májilis depýtattaryna mindetti áleýmettik saqtandyrý máseleleri boıynsha keıbir zańnamalyq aktilerge ózgerister engizý týraly zań jobasyn tanystyrdy.