Jumysqa ornalasqandar týraly málimet qalaı avtomattandyrylady - mınıstr jaýaby

NUR-SULTAN. QazAqparat – Búgin Úkimet otyrysynda QR Eńbek jáne halyqty áleýmettik qorǵaý mınıstri Serik Shápkenov jumysqa ornalasqandar týraly aqparat qalaı avtomattandyrylatyn aıtty, dep habarlaıdy QazAqparat tilshisi.

«Jumysqa ornalasqandar týraly aqparatty avtomatty túrde qaıta tekserý tetigin engizý maqsatynda kelesi jumystar júrgiziledi: Qarjy jáne Indýstrııa mınıstrlikterimen birge salyq, mindetti zeınetaqy jarnalaryn tóleý, sondaı-aq qazaqstandyq úlesti tekserý úshin avtomattandyrylǵan baqylaý ornatý bóliginde aqparatpen almasý uıymdastyrylady. Óz kezeginde, Eńbek mınıstrligi tarapynan bir adamdy qaıta-qaıta engizýge jol bermeý jáne eńbek kelisimsharttaryn tirkeý boıynsha aqparattyq júıeni jetildirý jumystary júrgiziledi», - dedi ol.

Osy oraıda mınıstr jergilikti atqarýshy organdar qarastyrylǵan sharalardy iske asyrýdy qatań baqylaýdy jáne tekserýshi organdardyń mindetti zeınetaqy jarnalaryn, salyq tólemderin rastaý boıynsha ózara is-áreketterin qamtamasyz etýi kerektigin basa aıtty.

«Joǵaryda atalǵan barlyq shara Jumyspen qamtýdyń jol kartasyn iske asyrý aıasynda naqty jumys oryndaryn qurýǵa baqylaýdy kúsheıtýge jáne ashyqtyqty arttyrýǵa múmkindik beredi», - dedi Serik Shápkenov.