Jumysqa alý rásiminiń ashyq bolǵany mańyzdy - Elbasy
Jıynǵa Premer-Mınıstr A.Mamın, Prezıdent Ákimshiliginiń Basshysy B.Saǵyntaev, «Samuryq-Qazyna» aktsıonerlik qoǵamynyń basqarma tóraǵasy A.Esimov, «Samuryq-Qazyna» aktsıonerlik qoǵamynyń táýelsiz dırektory R.Evans, Tuńǵysh Prezıdenttiń kómekshisi D.Aqyshev, basqarma músheleri jáne Qordyń ulttyq kompanııalarynyń basshylary qatysty.
Otyrysta «Samuryq-Qazyna» aktsıonerlik qoǵamynyń 2018-2028 jyldarǵa arnalǵan damý strategııasyn júzege asyrý týraly esep tyńdaldy, sondaı-aq Qordy odan ári transformatsııalaý jónindegi tapsyrmalardyń oryndalý barysy talqylandy.
- Qor el ekonomıkasynda mańyzdy ról atqarady. Biz ozyq halyqaralyq tájirıbeni zerdelep, osy Qordy qurdyq. Búginde «Samuryq-Qazyna» qory el ekonomıkasyn damytýǵa eleýli úles qosyp keledi, - dedi Elbasy.
Basqosý barysynda «Samuryq-Qazyna» aktsıonerlik qoǵamynyń basqarma tóraǵasy A.Esimov korporatıvtik ortalyqtardyń qurylymyn ońtaılandyrý jáne Qordyń basqarý deńgeılerin qysqartý nátıjeleri týraly baıandady. Nursultan Nazarbaevqa Qor kompanııalaryn jekeshelendirý, ındýstrıaldyq-ınnovatsııalyq damý jáne «Nurly jol» baǵdarlamalaryn iske asyrý barysy týraly málimdeldi.
A.Esimovtyń aqparatyna sáıkes, búgingi tańda Qor jalpy somasy 8 trıllıon teńgeni quraıtyn 54 jobany júzege asyrýda jáne 68 myń jańa jumys orny ashyldy.
- Biz Qor portfelin ártaraptandyrý úshin egemen qorlarmen jáne halyqaralyq ınvestorlarmen strategııalyq seriktestik ornatý múmkindikterin qarastyryp jatyrmyz. Qazirgi tańda jalpy somasy 13,3 mıllıard dollardy quraıtyn eki jaqty 28 kelisimge qol qoıyldy, - dedi «Samuryq Qazyna» AQ basqarma tóraǵasy.
Jıynda, sondaı-aq, R.Evans, A.Mamın jáne ulttyq kompanııalardyń basshylary baıandama jasady.
Qazaqstannyń Tuńǵysh Prezıdenti ulttyq ál-aýqat qorynyń qyzmeti jiti baqylaýynda bolatynyn atap ótti.
- Qordyq basty mindeti - aktıvterdi kóbeıtý, tabysty arttyrý jáne ulttyq kompanııalardy damytý. Qor aktıvteriniń el ekonomıkasy úshin strategııalyq mańyzy bar. Jańa basshylyq jumysynyń oń nátıjelerin atap ótkim keledi. Qysqa merzim ishinde qaryzdy azaıtyp, kompanııalardyń tabysty jumys isteýin, qarjy quraldaryn tıimdi basqarýdy qamtamasyz ete aldyq, - dedi Nursultan Nazarbaev.
Elbasy, sondaı-aq, Qordyń satyp alýlardy uıymdastyrý jáne kásipkerlikti qoldaý salasyndaǵy jumysynyń nátıjelerin joǵary baǵalady.
- Qor ishinde bir jerden satyp alý aıtarlyqtaı qysqaryp, tenderlerdiń kólemi artty. Olar ashyq ótkiziletin boldy. Búginde jumsalatyn shyǵyn 5 ese azaıdy. Ókinishke qaraı, memlekettik organdardyń satyp alý isinde mundaı nátıje joq. Mindetter durys belgilengen jaǵdaıda qoldanystaǵy zań normalary da mıllıardtaǵan teńgeni únemdeýge múmkindik beretinin Qor qyzmeti aıqyn kórsetip otyr, - dedi Qazaqstannyń Tuńǵysh Prezıdenti.
Nursultan Nazarbaev Qordyń adam resýrstaryn basqarý salasynda qolǵa alyp jatqan sharalaryna qoldaý bildirdi.
- Kompanııalar men kásiporyndardyń basty aktıvi - adamdar. Jumysqa alý rásiminiń ashyq bolǵany mańyzdy. Barlyq taǵaıyndaýlar transparentti bolýǵa tıis, - dedi Elbasy.
Jıyn qorytyndysy boıynsha Qordyń qarjy jaǵdaıyn odan ári jaqsartýǵa, elimizdiń taýar óndirýshilerin qoldaýǵa, «Qazaqtelekom» jáne «Air Astana» kompanııalarynyń aktsııalaryn IPO-ǵa shyǵarýǵa baǵyttalǵan sheshimder qabyldandy.
