Jumys toby kópbalaly otbasylardy qoldaý usynystaryn ázirledi
Eńbek jáne halyqty áleýmettik qorǵaý vıtse-mınıstri Svetlana Jaqypova jumys toby ázirlegen usynystardy, ıaǵnı 18 jasqa deıingi balalarǵa áleýmettik qoldaýdyń keıbir sharalaryn ońtaılandyrý arqyly járdemaqy engizý týraly aıtty. Sonymen qatar, kópbalaly analardy jáne múgedektigi bar balalardy tárbıelep otyrǵan analardy zeınetaqymen qamtamasyz etý, AÁK taǵaıyndaý kezinde jalpy kiristi esepteý ádistemesin ózgertý, kúnkóris mınımýmynyń qurylymyn qaıta qaraý, kópbalaly ana mártebesin rastaıtyn kýálik berý jáne basqa da qadamdar týraly baıandaldy.
«Jumys tobynyń birqatar usynystary óz sheshimin tapty. Atap aıtqanda, Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasyna túzetýler daıyndaldy. Máselen, jumyspen qamtýdy qamtamasyz etý jáne tabysyn arttyrý úshin kópbalaly aýyl turǵyndaryna jańa bıznes-ıdeıalarǵa qaıtarymsyz 505 myń teńge mólsherinde memlekettik granttar beriletin bolady. Bıylǵy jyly aýylda kópbalaly analar men múmkindigi shekteýli jandar arasynda kásipkerlikti damytýǵa 5 myńnan astam mıkronesıe bólinedi», - delingen mınıstrlik málimetinde.
Munymen qosa, kópbalaly az qamtylǵan aýyldaǵy otbasylar úshin qajetti mamandyqtarǵa qysqa merzimdi oqytý uıymdastyrylady. Jekelegen jumys túrleri boıynsha jalaqyny sýbsıdııalaýmen úıde áleýmettik jumys oryndary qurylatyn bolady. Barlyq aıtylǵan usynystar egjeı-tegjeıli qaralyp, tıisti sheshimder qabyldanady.
Belgili bolǵandaı, mınıstrlik áleýmettik jaǵdaıy tómen otbasylarǵa jergilikti atqarýshy organdar tarapynan kórsetiletin áleýmettik kómek pen qyzmetterdiń biryńǵaı paketin ázirledi. Áleýmettik pakette jergilikti atqarýshy organnyń qarajaty esebinen áleýmettik qoldaý jáne áleýmettik qyzmetter kórsetýdiń 11 sharasy qamtylǵan.
Ákimdikterdiń málimetinshe, 2019 jyly 287 myń bala mektepterde tegin tamaqpen, 553 myń adam tegin jol júrýmen, 219 myń oqýshy mektep formasymen jáne ózge de kerek-jaraqpen, 30 myńǵa jýyq jetkinshek balabaqshada orynmen qamtamasyz etiledi, sondaı-aq 186 myń bala lagerge joldama alady.
Budan bólek, 460 myńnan astam adam bir jolǵy kómek alady, 5 myń AÁK alýshy jumyspen qamtylady, 5 myń adam turǵyn úı qurylys jınaqtary júıesi arqyly baspana jaǵdaıyn jaqsartady. Jalpy áleýmettik kómektiń barlyq túrlerimen 83,1 mlrd teńgege 821 myń adamdy qamtý josparlanýda.
«Kóptegen máselelerdi sheshý úshin tıisti zertteý sharalary kerek, sondyqtan ol ýaqyt talap etedi. Olardyń barlyǵy birte-birte sheshiledi. «Nur Otan» partııasynyń sezinde aıtylǵan Elbasynyń «Áleýmettik qamqorlyq» bastamalary keshendi sıpatqa ıe, azamattardyń ál-aýqatyn arttyrýǵa baǵyttalǵan uzaq merzimdi maqsattarmen baılanysty. Qabyldanǵan sharalar - bul tek birinshi kezeńi ǵana. Mınıstrlik osy baǵytta jumystardy jalǵastyrýda», - dedi Berdibek Saparbaev.
Otyrysty qorytyndylaı kele, B. Saparbaev halyqtyń az qamtylǵan toptaryn qoldaý memlekettiń áleýmettik saıasatynyń basty basymdyqtarynyń biri ekenin atap ótti. Osyǵan baılanysty Eńbek jáne halyqty áleýmettik qorǵaý mınıstrligi memlekettik organdar qabyldaıtyn áleýmettik sharalardyń oryndalýyna turaqty negizde monıtorıng júrgizetin bolady.
