Jumys toby Qazaqstandaǵy janar-jaǵarmaı baǵasyn retteý boıynsha birqatar sharalardy qabyldaýda - S. Myńbaev
A. Qarashanyń 16-sy. QazAqparat /Ernur Aqanbaı/ - Quramyna Básekelestikti qorǵaý agenttiginiń, Tabıǵı monopolııalardy retteý agenttiginiń, Energetıka jáne mıneraldy resýrstar mınıstrliginiń ókilderi kiretin arnaıy jumys toby Qazaqstandaǵy janar-jaǵarmaı baǵasyn retteý boıynsha birqatar sharalardy qabyldaýda.
Bul týraly búgin Úkimettiń selektorlyq keńesinde Energetıka jáne mıneraldyq resýrstar mınıstri Saýat Myńbaev aıtty, dep habarlaıdy QazAqparat.
Onyń aıtýynsha, atap aıtqanda kórshi elderden joǵary oktandy benzındi qosymsha jetkizý úshin toplıngtik operatsııalardy shapshańdatý josparlanyp otyr. Budan bólek, mınıstrlik oblystarǵa benzındi jetkizý boıynsha kestelerdi bekitý jumystaryn jalǵastyrýda. Sonymen qatar, ákimshilik baqylaýdy kúsheıtý úshin mınıstrlik oblystar boıynsha benzınniń qaıda jáne qansha jumsalǵanyn qarap otyratyn karta ázirlegen. Bul karta taıaý ýaqytta paıdalanylatyn bolady. «Básekelestikti qorǵaý agenttigi janar-jaǵarmaı naryǵyndaǵy domınanttardy anyqtady. Olar úshin tabıǵı monopolııalardy retteý agenttigi baǵalardy bekitti. Alaıda, munyń saldary joǵary oktandy benzınniń jetispeýshiligine jáne onyń sapasynyń nasharlaýyna ákelip otyr. Sebebi, qazir tómengi oktandy benzınnen joǵary oktandy benzın jasaý umtylystary baıqalýda», dedi mınıstr.
S. Myńbaevtyń sózine qaraǵanda, Qazaqstanda joǵary oktandy benzınniń shamamen 37 paıyzy Reseıden ımporttalady. Sebebi, bizdiń zaýyttarymyz respýblıkamyzǵa qajetti joǵary oktandy benzındi tehnıkalyq jaǵynan óndire almaıdy. «Bul benzınniń Reseıdegi baǵasy erkin jáne benzın úshinshi elderge erkin eksporttalýda. Tıisinshe Reseıdegi benzınniń baǵasy álemdik rynoktaǵy baǵaǵa baılanysty túziledi. Biz Reseıden 40 paıyzǵa jýyq benzındi ımporttaı otyryp, onyń baǵasynyń yqpalynan aýytqı almaımyz. Reseı men Qazaqstannyń janar-jaǵarmaı naryǵynyń ózara yqpaldasýy Keden odaǵy qurylǵannan keıin budan da aıqyn bola túsedi», dedi mınıstr.
