Jumys sapaly ári kestege saı júrgizilsin – Ermek Marjyqpaev
KÓKShETAÝ. QazAqparat – Aqmola oblysynda «Aýyl – El besigi» jobasy jáne «Jumyspen qamtýdyń jol kartasy» memlekettik baǵdarlamasy sheńberinde qurylys jáne jóndeý jumystary qarqyndy júrgizilýde, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Vedomstvonyń málimetinshe, aımaq basshysy Ermek Marjyqpaev Sandyqtaý aýdanynda bolyp atalmysh baǵdaralamalardy júzege asyrý barysymen tanysty. Qurylys alańdarynda bolǵanynda merdigerlermen kezdesip, jumysty sapaly oryndaýdy tala etti.
Aıtalyq, 213 oqýshy oqıtyn Sandyqtaý orta mektebine «Aýyl – El besigi» jobasy sheńberinde 200 mıllıon teńgeden astam qarajat bólingen. Kúrdeli jóndeý jumystary ústimizdegi jyly mamyrdyń 20-synda bastalyp, tamyzdyń 25-inde aıaqtalýy tıis bolatyn. Alaıda, jóndeý merziminen keshigýde. Qurylys alańynda bolǵan aımaq basshysy merdiger «Daıana Servıs» JShS jumysyna syn aıtyp, oryn alǵan olqylyqtardy joıýdy jáne jóndeý jumystaryn qazannyń 1-ne deıin aıaqtaýdy tapsyrdy. Jańa oqý jyly atalmysh mekteptegi 135 bala qashyqtan oqytylsa, 78 oqshy shtattyq rejımde bilim alady.
Bıyl Balkashıno selosynda aýylishilik joldar jóndeýden ótkizilýde. Qazirgi kezde 20 shaqyrym jolǵa asfalt tóseledi. Taǵy 20 shaqyrym jolǵa asfalt tóseý josparlanǵan.
Al «Jumyspen qamtýdyń jol kartasy» memlekettik baǵdarlamasy sheńberinde 600 mıllıon teńge qarjy bólinse, onyń 44 mıllıon teńgesi «Saryarqa» mádenıet úıin jóndeýge baǵyttalǵan.
Sonymen birge, Balkashıno selosynda 14 mıllon teńgege sport alańy jóndelip jatyr. Aýmaǵy 924 sharshy metr fýtbol alańyna jasandy shóp tóselýde.
Balkashıno aýylynda «Mıras» balabaqshasyna da kúrdeli jóndeý jumystary sapasyz oryndalǵan Belgili bolǵandaı bul nysanǵa da «Daıana Servıs» JShS kúrdeli jóndeý jumystaryn júrgizýde.
Jalpy, Sandyqtaý aýdanyna «Aýyl – El besigi» jobasy sheńberinde bilim ordalary men aýdandyq aýrýhanany jóndeý úshin 1 mıllıard teńge qarjy bólingen. Aýrýhanada bolǵanynda medıtsına qyzmetkerlerimen kezdesip, koronavırýs ınfektsııasymen kúresýde dárigerlerdiń kásibı sheberligin erekshe atap ótti.
