Jumys oryndarynyń aǵymdaǵy jáne aldaǵy jalpyulttyq málimetter bazasy qurylady - G. Ábdiqalyqova
ASTANA. 16 mamyr. QazAqparat /Qanat Mámetqazyuly/ - Jumyspen qamtýdyń jańa baǵdarlamasy aıasynda jumys oryndarynyń aǵymdaǵy jáne aldaǵy jalpyulttyq málimetter bazasy qurylady.
Búgin QR Parlamenti Májilisiniń Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
Mınıstrdiń aıtýynsha, baǵdarlamanyń jańashyl tusynyń biri oǵan qatysýshy men memleket arasynda jasalatyn áleýmettik kelisim-shartty engizý bolyp otyr. Bunda negizinen jumysqa ornalastyrýdy qosa alǵanda ózara mindettemeler týraly kelisimder qamtylady.
«Baǵdarlamaǵa qatysýshylardy jumysqa ornalastyrý maqsatynda aǵymdaǵy jáne perspektıvadaǵy jumys oryndarynyń málimetter bazasy qurylatyn bolady. Bul barlyq ınvestıtsııalyq jobalardyń júzege asyrylýy esepke alynyp jasalady. Budan bólek, kásibı oqytýdan keıin, turaqty jumys oryndaryna ornalastyrǵan soń, kásiporyndarda áleýmettik jumys oryndaryn qurý keńinen qamtylatyn bolady. Bul rette atalǵan jumys oryndary 12 aıǵa deıin ári jalaqynyń jartysyna jýyǵy memleket tarapynan ótelýge eseptelip qurylady», - dedi G. Ábdiqalyqova.
Sonymen qatar, mınıstrdiń aıtýynsha, memleket baǵdarlamaǵa qatysqysy keletinderdi oqytyp, jumyspen qamtýǵa nıet tanytqan kásiporyndar men uıymdarǵa da qoldaý jasaıdy. Bul rette kadrlardy daıarlaýǵa arnalǵan shyǵynnyń 70 paıyzy jumys berýshige memleket tarapynan óteledi. «Bul komponent 2012 jyldan bastap iske asady», - dedi G. Ábdiqalyqova.
