Jumys kúshin shet elderden tartýdyń sońy tyǵyryqqa tireletinin eskerý kerek - Májilis depýtaty
Bilikti kadrlardy daıyndaý men qaıta daıyndaý el ekonomıkasyn kóterýde mańyzdy rolge ıe. Ol ásirese, tap qazirgideı jaǵdaıda óziniń erekshe qajettiligin kórsetip otyr. Osy oraıda aıta ketý kerek, jumysshy kúshterine degen jedel túrde ósip otyrǵan suranysty otandyq jumys kúshiniń esebinen tolyqtyrdyq dep aıtý qıyn. Nátıjesinde qazir elimizge shetten tartylǵan mamandar sany ósip otyr. Bul pikirdi búgin Astanada «Innovatsııalyq ekonomıkaǵa arnalǵan qazirgi zamanǵy tehnıkalyq jáne kásibı bilim berý» atty taqyrypta ótken dóńgelek ústel otyrysynda Parlament Májilisiniń depýtaty Dınar Núketaeva bildirdi, dep habarlaıdy QazAqparat.
Onyń aıtýynsha, elimizge ózge elderden tartylǵan jumys kúshteriniń qomaqty bóligin tehnıkalyq jáne qyzmet kórsetý salasyndaǵy jumysshylar qurap otyr. «Árıne, jumys kúshine degen tapshylyqty sheteldikterdiń kómegimen sheshý áldeqaıda jeńil. Biraq onyń sońy memleket úshin tyǵyryqqa tireletinin eskerýimiz kerek. Sondyqtan bizge erekshe suranys týdyryp otyrǵan kadrlardy ózimizde daıyndaýǵa kúsh salǵan abzal. Bul rette Memleket basshysy bizge kásiptik-tehnıkalyq bilim berýdi damytý týraly arnaıy baǵdarlama daıyndaý jóninde mindet qoıdy. Bul oraıda Prezıdent mamandar daıarlaý isine shet memleketten shaqyrylatyn ǵalymdar men ustazdardyń memleket erekshe qajet etip otyrǵan mamandardy daıarlaý salasyna tartylýy qajettigin eskertken bolatyn», dedi depýtat.
Onyń sózine qaraǵanda, kadrlardaǵy qazaqstandyq qamtý isine jumys berýshiler men olardyń qaýymdastyqtarynyń ókilderi belsendi túrde qatysýlary kerek. Óıtkeni elde daıyndalatyn mamandar birinshi kezekte sol jumys berýshilerge qajet.
