Jumys kúshi tapshy óńirlerge qonys aýdarǵan jastardyń 76 paıyzy jumysqa turdy

NUR-SULTAN. QazAqparat – «Eńbek baǵdarlamasy» arqyly jumys kúshi tapshy óńirlerge qonys aýdarǵan jastardyń 76 paıyzy turaqty jumys tapqan, dep habarlaıdy QazAqparat tilshisi.

Jumyspen qamtý jáne halyqty áleýmettik qorǵaý mınıstrliginiń ókilderi QazAqparat saýalyna osyndaı jaýap berdi.

«Jergilikti atqarýshy organdardyń derekterine sáıkes 2017 jyldan beri qonys aýdarǵan 26,6 myń adamnan 515 adam óziniń burynǵy aımaǵyna qaıta kóship ketken. Al turaqtap qalǵan azamattardyń qatarynan 14,1 myń eńbekke qabiletti jastaǵy azamattar bolsa, 11,8 myńy 18 jasqa deıingi balalar, 686 adam zeınetker bolyp keledi», - deıdi mınıstrlik mamandary.

Vedomstvonyń jaýabynda atalǵan 14,1 myń eńbekke jaramdy adamnyń 10,4 myńy jumysqa ornalastyrylǵany aıtylady. Sondaı-aq, jeke isin damytýǵa qoldaý kórsetý úshin 89 adamǵa mıkrokredıt berilse, 173 adam memlekettik grant ıegeri atanypty. Bul eńbekke qabiletti jastaǵy azamattardyń 76%-y degen sóz.

«Jumysqa ornalastyrylmaǵan qonys aýdarýshylardyń 4 myńy 3 jasqa deıingi bala kútimine baılanysty demalystaǵy analar, qalǵandary múgedek adamdar, úı sharýasyndaǵy áıelder jáne basqalar bar», - delingen jaýapta.