Jumys izdeýshiler men jumys berýshilerge arnalǵan jańa qyzmet túri iske qosyldy

ASTANA. QazAqparat - QR Eńbek jáne halyqty áleýmettik qorǵaý mınıstrligi jáne «Ulttyq aqparattyq tehnologııalar» AQ birlesip, jumyssyzdar men jumys berýshilerge arnalǵan Telegram-bot qyzmetin iske qosty, dep habarlaıdy QazAqparat tilshisi.

Jańadan iske qosylǵan @EgovKzBot Telegram-bottyń qyzmeti jumys izdeýshiler men jumys berýshilerge arnalǵan.

«Jumys izdeýshi nemese jumys berýshi ózine tıisti, ıaǵnı «Jumys izdeý» nemese «Maman izdeý» komandasyn tańdaýy kerek. «Jumys izdeý» qyzmetin tańdaǵanda, paıdalanýshy jumys izdeıtin aımaq pen qyzmet túrin kórsetýi tıis», - delingen mınıstrliktiń Feısbýktegi paraqshasynda. 

Habarlamada aıtylǵandaı, izdeý nátıjesinde qoldanýshy @EgovKzBot enbek.kz elektrondy eńbek bırjasyndaǵy bos oryndardyń jalpy sany nemese kórsetilgen parametrler boıynsha bos oryndardyń joqtyǵy týraly aqparat alady.

«Maman izdeý» komandasy jumys berýshilerge tıisti qyzmetkerdi tabýǵa múmkindik beredi. Ol úshin qosymshaǵa aımaq ataýyn jáne tıisti mamanmen oǵan qatysty derekterdi engizýińiz kerek.Nátıjesinde mamandardyń tolyq tiziminen jeke kartochkalaryn qarap, tıisti kandıdatýrany suhbatqa/suhbattasýǵa shaqyrýǵa bolady», - delingen habarlamada.

Aıta ketsek, Ulttyq aqparattyq tehnologııalar AQ budan bólek «Elektrondy úkimet», «Ashyq úkimet» portaldary jáne mGov.kz qosymshasy, telegram bot @EgovKzBot sol sııaqty 1414 biryńǵaı baılanys ortalyǵy sekildi aqparattyq júıelerge tehnıkalyq qoldaý kórsetýmen qatar memlekettik derekter bazasyndaǵy aqparattyń qaýipsizdigine jaýap beredi.