Jumys izdep ketken 57 jastaǵy er adam tabylmaı jatyr - Aqmola oblysy
KÓKShETAÝ. QazAqparat – Aqmola oblysynda jumys izdep ketken er adamǵa polıtsııa izdeý jarııalady, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, maýsymynyń 23-de Bulandy aýdandyq PB kezekshilik bólimine Makınsk qalasynyń turǵyny 51 jastaǵy áıel habarlasyp, 1963 jylǵy kúıeýi Mıhaıl Ivanovıch Popovty izdep tabýǵa kómek surady. Áıeldiń aıtýynsha, kúıeýi 4 maýsym kúni Aqkól aýdanynyń Novorybınka aýyly aýmaǵynan joǵalyp ketken. Sodan beri odan esh habar joq.
Mıhaıl Ivanovıchtiń boıy 165-170 sm, dene bitimi aryqsha, shashy aǵarǵan, qysqa qyrqylǵan, murtty. Joǵalǵan kezde ústinde aq kóılek jáne qara shalbar kıgen.
«Qazirgi kezde polıtsııa qyzmetkerleri onyń týystary men tanystaryn, joǵalǵany kúni sońǵy ret kórgen adamdardy surastyrýda. Sonymen birge arnaıy top oblys aýmaǵynan izdestirýde. Mıhaıl Popovty kórgen nemese júrgen jerin biletin adamdar bolsa, «102» arnaıy jelisine qońyraý shalýyna nemese tártip saqshylaryna habarlaýyna bolady», - deıdi vedomstvodan.
