Jumys isteıtin elordalyq jastarǵa arnalǵan páterge qonystandyrý qańtar aıynan bastalady

NUR-SULTAN. QazAqparat – Jumys isteıtin jastarǵa arnalǵan satyp alý quqyǵynsyz jalǵa beriletin páterge ıe bolǵan elordalyqtar jańa jyldan keıin qonys toıyn toılaıdy, dep habarlaıdy QazAqparat qalalyq Turǵyn úı qoryna silteme jasap.

«Jumys isteıtin jastarǵa arnalǵan satyp alý quqyǵynsyz jalǵa beriletin turǵyn úı» baǵdarlamasy boıynsha sertıfıkat alǵandar úshin qazirgi ýaqytta páterdiń qujaty men jalǵa alý kelisimsharty daıyndalýda. Páter kiltin berý jáne ornalastyrý kestege sáıkes 2020 jyldyń 5 qańtarynan bastap josparlanǵan», delingen Turǵyn úı qorynyń habarlamasynda.

Kiltdi berý orny men ýaqyty týraly qosymsha SMS habarlama jiberiledi. «Úı daıyn, biraq árbir páterdi aldaǵy ýaqytta shaǵym aıtylmaý úshin ótinish berýshimen birge maman baryp qaraıdy. Osyǵan baılanysty barlyǵyn bir kúnde bir mezgilde qonystandyrý múmkin emes bolǵandyqtan, kiltterdi berý kestege sáıkes kúnder boıynsha bólingen», delingen habarlamada.

Árbir ótinish berýshiniń kiltin berý kestesi jaqyn arada zhilfond.kz saıtynda jarııalanady.

Eske sala ketsek, Táýelsizdik merekesi qarsańynda elordada jumys isteıtin 1050 jas azamatqa jaldamaly páter kilti tabys etildi.