Jumys isteýshi áıelderdiń bala kútimine baılanysty mindetti zeınetaqy jarnalary 2014 jyldan bastap aýdaryla bastaıdy - Parlament
ASTANA. 12 jeltoqsan. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» QR zańyn qabyldady.
Eske sala keteıik, Elbasy byltyrǵy zeınetaqy júıesin jańǵyrtýǵa qatysty atqarylǵan sharalar boıynsha halyqqa úndeý jasap, Úkimetke azamattardyń zeınetaqy jınaqtaryn arttyrý boıynsha naqty tapsyrmalar júktegen edi. Osyǵan oraı, Eńbek jáne halyqty áleýmettik qorǵaý mınıstri Tamara Dúısenova Úkimettiń Elbasy tapsyrmasyn eldiń qarjylyq jaǵdaıyna qaraı kezeń-kezeńimen oryndaýdy kózdeıtinin atap ótti. «Osyǵan oraı, qaralyp otyrǵan qujatty eń aldymen bala kútimi boıynsha demalys kezinde jumys isteýshi áıelderdiń mindetti zeınetkerlik salymyna memleket esebinen qosymsha tólemaqyny qamtamasyz etý máseleleri qarastyrylady. Ekinshiden, mindetti kásibı zeınetaqy salymyn tóleýshi jumys berýshilerdiń aıryqsha jáne zııandy óndiristerdi joıý nemese sanyn kemitýdi kózdeıtin yntalandyrý tetikteri qarastyrylady», - deıdi mınıstr. Onyń túsindirýinshe, jumys isteýshi áıelderdiń mindetti zeınetkerlik salymyna qosymsha tólemaqy 2014 jyldan bastap qarjylandyrylatyn bolady. Bul rette boljamdy 10 paıyzdyq aýdarymdardyń 4 paıyzy mindetti áleýmettik saqtandyrý qorynan qarjylandyrylatyn áleýmettik tólemder esebinen, alty paıyzy respýblıkalyq bıýdjet qarajaty esebinen qamtamasyz etiledi.
«Qarastyrylyp otyrǵan shara jumys isteýshi áıelderdiń bala bir jasqa tolǵanǵa deıin onyń kútimine baılanysty demalysqa bolǵanyna qaramastan, olardyń jeke zeınetaqy shottaryna mindetti zeınetaqy jarnalaryn tolyq túsýin qamtamasyz etedi. Zeınetaqy jınaǵynyń ulǵaıyna sep bolady. Al mundaı tólemaqyny jyl saıyn 150 myńnan astam áıel-analar alyp otyrady dep boljaımyz», - deıdi Tamara Dúısenova. Onyń aıtýynsha, atalmysh sharany der kezinde qarjylandyrý úshin 2014-2016 jyldarǵa arnalǵan respýblıkalyq bıýdjet týraly zańynda 30,6 mlrd. teńge qarastyrylyp otyr. Sonyń ishinde 2014 jylǵa 8,8 mlrd. teńge bólingen.
