Jumys istemeıtin arnaıy ekonomıkalyq aımaqtardy joıý kerek - N. Nazarbaev

ASTANA. 11 qazan. QazAqparat - Jumys istemeıtin arnaıy ekonomıkalyq aımaqtardy joıý kerek. Búgin Aqordada elimizdiń ótken 9 aıynyń damý qorytyndylaryna arnalǵan Úkimettiń keńeıtilgen otyrysynda Memleket basshysy Nursultan Nazarbaev osyndaı tapsyrma júktedi.

«Árbir ákim arnaıy ekonomıkalyq aımaq (AEA) qurýdy ózine borysh sanaıtyn bolyp aldy. Biraq odan paıda joqtyń qasy. Atyraý oblysynda AEA bazasynda 33 jobanyń 3-eýi ǵana júzege asypty. Almaty, Pavlodar oblystarynda aımaq qurdy, birde-bir joba joq. Ótken jyly men Pavlodarda tústi metallýrgııadan ónim óndiretin, odan allıýmınıı alyp, daıyn buıymdar shyǵaratyn sýbaımaq qurýdy júktedim. Bul ne boldy?» - dedi N. Nazarbaev Pavlodar oblysynyń ákimine qarata sóılegen sózinde.

Sosyn Elbasy Úkimet basshysyna barlyq arnaıy ekonomıkalyq aımaqty zerttep, jumys istemeıtin kereksizderin túgel joıýdy tapsyrdy. «Bul memleket qarajatyn qur shashqandy ǵana kórsetip otyr», - dedi Memleket basshysy.