Jumys istemeıtin adam ǵana qatelespeıdi - Bıgeldi Ǵabdýllın
ASTANA. QazAqparat - Búgin Astana qalalyq qylmystyq ister jónindegi mamandyrylǵan aýdanaralyq sotynda «CentralAsiaMonitor» basylymynyń bas redaktory jáne «Radiotochka.kz» dırektory Bıgeldi Ǵabdýllıniń isi boıynsha jaryssóz boldy, dep xabarlaıdy QazAqparat tilshisi.
Óz sózinde Ǵabdýllın kezinde Almaty qalalyq máslıxatynyń depýtaty bolǵanyn, osy ýaqytqa deıin 3 orden men 18 medal alǵanyn, sondaı-aq QR Prezıdenti Nursultan Nazarbaev týraly kitap jazǵanyn eske alyp, ýaqytsha qamaý abaqtysynda otyrǵanda bárin oı eleginen ótkizgeni jetkizdi. «Adam óltirgen jáne zorlaǵan qaskóıler, urylar men alaıaqtardyń arasynda otyryp, men búkil ómirimidi qaıtadan zerdelep shyqtym. 36 jyldyń ishinde bes buqaralyq aqparat quralyn quryp, alty respýblıkalyq gazetti basqardym. Myńdaǵan maqalalar, birneshe kitap jazyp shyqtym. Sýyq ári dymqyl kamerada jatyp, men ótken jyldyń jumysyn taǵy bir márte oı eleginen ótkizdim. Jumys istemeıtin adam ǵana qatelespeıdi. Meniń óz qaramaǵymdaǵy basylymdarǵa memlekettik aqparattyq tapsyrysty ulǵaıtýǵa degen zańsyz áreketterimdi durys túsinesizder dep oılaımyn. Men ol basylymdardyń qarjylyq jaǵyn ǵana oıladym. Sóıtip, óz talaptarymdy qoıyp, qalaısha shekten asqanymdy baıqamaı qaldym. Meni eshkim mindettegen joq. Bul meniń jeke sheshimim boldy», - dedi Ǵabdýllın. Osydan keıin ol óz kinásin moıyndaǵanyn, eki balasynyń kámelettik jasqa tolmaǵanyn, shyǵyndy tolyǵymen ótegenin, sondaı-aq ózine shaǵymdanǵandardyń ony bosatýdy suraǵanyn eskerip, ózine qatysty prokýrordyń aıtqan jazasyn qoldanýdy ótindi.
Aıta keteıik, búgingi otyrys barysynda prokýror Álibek Aıtjanov Ǵabdýllındi sot zalynan bosatýdy surady. https://kaz.inform.kz/news/prokuror-gabdulindi-sot-zalynan-bosatudy-surady_a2991853 buǵan deıin ótken otyrysta Bıgeldi Ǵabdýllınniń múlki jarııalanǵan bolatyn. https://kaz.inform.kz/news/sot-gabdullinnin-mulkin-zhariya-etti_a2990981 CentralAsiaMonitor-dyń bas redaktory ári Radiotochka.kz dırektory Bıgeldi Ǵabdýllın Astana qalasy Almaty aýdandyq №2 sotynyń sanktsııasymen tutqynǵa alynǵan. Ol «Central Asia Monitor» jáne «Radiotochka.kz» buqaralyq aqparat quraldarynyń paıdasyna bıýdjettik qarjyny alý úshin bopsalaý áreketine bardy dep aıyptalyp otyr. Sot sheshimi erteń qańtardyń 24-i kúni shyǵady.
