Jumys berýshisiniń malyn satyp kelgen Almaty oblysynyń turǵyny qamaýǵa alyndy
Almaty oblystyq Polıtsııa departamenti baspasóz qyzmetiniń málimetinshe, Jambyl aýdany Yntymaq aýylynyń 28 jastaǵy turǵynyna qatysty bótenniń múlkin ıemdený nemese jymqyrý jáne mal urlyǵy boıynsha is aıyptaý aktisimen sotqa joldady.
Sotqa deıingi tergeý barysynda B. esimdi azamattyń sharýa qojalyǵynda malshy bolyp jumys istep júrip, 2019 jyldyń 30 jeltoqsanynda túngi ýaqytta S. esimdi azamattyń quny 418 194 teńge bolatyn jylqy malyn urlap, ony dosyna 400 000 teńgege satqany anyqtaldy. Túsken aqshany óz qajetiligine jumsaǵan. Jylqy tárkilenip, jábirlenýshige qaıtarylǵan bolatyn.
Alaıda ol 2021 jyldyń shildesinde jalpy somasy 189 642 teńge bolatyn taǵy eki bas buzaýdy urlap ketken. Bul oqıǵalardan soń jumystan bosatylǵan aıyptalýshy taǵy bir márte mal urlyǵyn jasaýǵa nıettengen. Júk kóligin jaldap, onyń júrgizýshisine óziniń malyn alyp jatqanyn jetkizip, burynǵy jumys berýshisiniń 2 sıyryn tıep alyp ketken. Olardy Talǵar aýdany Gúldala kentinde ornalasqan mal bazaryna aparyp, dosyna 400 000 teńgege satqan. Eki janýar da alynyp, zańdy ıesine qaıtaryldy.
«Sotqa deıingi tergeý barysynda kúdikti aǵymdaǵy jyldyń 20 qazanynda qamaýǵa alyndy. Onyń is-áreketteri QR QK-niń 188-1-baby 3-bóligi 2-tarmaqshasy jáne 189-baby 1-bóligi boıynsha saralandy. Joǵaryda kórsetilgen baptardyń sanktsııalaryna sáıkes sot kinásin moıyndaǵan jaǵdaıda sottalýshyǵa tıisti jaza sharasyn taǵaıyndaıtyn bolady», - deıdi Jambyl aýdandyq polıtsııa basqarmasynyń tergeýshisi Azamat Nursultan.
