Jumys berýshiniń mindetti zeınetaqy jarnalaryn engizý merzimi 2024 jylǵa aýystyrylady
Atalǵan norma ekinshi oqylymda maquldanǵan «Qazaqstan Respýblıkasynyń keıbir zańnamalyq aktilerine memlekettik jastar saıasaty jáne áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zań jobasynda qamtylǵan .
«Depýtattar eńbekaqy tóleý qoryna júktemeni azaıtýǵa baǵyttalǵan túzetýler engizdi. Zań jobasy aıasynda jumys berýshiniń mindetti zeınetaqy jarnalaryn engizý merzimin 2023 jyldan 2024 jylǵa aýystyrý jónindegi normalar kózdelgen. Bul rette osy jarnalardyń kezeńdik mólsherlemesin 2024 jylǵy 1 qańtardan bastap 1,5%-dan 2028 jylǵy 1 qańtardan 5%-ǵa deıin belgileý kózdeledi. Sonymen qatar, 2023 jylǵy 1 qańtardan bastap QR Salyq kodeksinde kózdelgen mıkro jáne shaǵyn kásipkerlik sýbektileriniń qyzmetkerleri úshin biryńǵaı tólemdi tóleý jónindegi normalardy engizý bóliginde túzetýler toptamasy kózdelgen», - delingen Májilistiń Áleýmettik-mádenı damý komıtetiniń qorytyndysynda.
Munymen qosa, qujatta memlekettik ataýly áleýmettik kómek alýshylarǵa usynylatyn kepildik berilgen áleýmettik toptamany monetalandyrý boıynsha normalar kózdeldi.
«Bul rette kepildik berilgen áleýmettik toptamany usyný, onyń qunyn óteý tártibin, sondaı-aq áleýmettik kórsetiletin qyzmetter portalynyń jumys isteý máselelerin retteıtin erejelerdi alyp tastaı otyryp, AÁK-ti taǵaıyndaý kezeńinde 1 jastan 6 jasqa deıingi balalarǵa árbir balaǵa 1,5 AEK mólsherinde qosymsha tólem belgileý kózdeledi», - dep atalyp ótken komıtet málimetinde.
Budan buryn habarlanǵandaı, atalǵan zań jobasy aıasynda depýtattar «jastar» uǵymynyń jas shegin 29-dan 35 jasqa deıin ulǵaıtýǵa baǵyttalǵan túzetý engizdi.
