Jumys berýshiler jalpy jumysshylar sanynyń 2-4 paıyzyn múgedekter kvotasyna usynatyn bolady
Búgin Májilistiń jalpy otyrysynda Densaýlyq saqtaý jáne áleýmettik damý mınıstri Tamara Dúısenova osylaı málim etti. Eske salaıyq, jalpy otyrysta «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldanǵan bolatyn.
Mınıstrdiń aıtýynsha, eger jumys berýshi múgedektiń jeke múmkindikteri men densaýlyǵynyń shekteýlerin eskere otyryp, tıisti jabdyqtalǵan jumys oryndaryn quratyn bolsa, onda memleket onyń osy jumysqa qatysty shyǵyndaryn sýbsıdııalaıtyn bolady. «Tutastaı alǵanda, halyqty jumyspen qamtý salasynda jumys berýshiler úshin jalpy jumysshylar sanynyń 2-4 paıyzyna deıin múgedekter kvotasyna belgileý usynylady», - dedi Densaýlyq saqtaý jáne áleýmettik damý mınıstri Tamara Dúısenova.
Onyń aıtýynsha, ishki kóshi-qon salasyndaǵy halyqtyń teńgerimsiz ornalasý máselesin sheshý múmkindikteri de qarastyrylǵan. Bul rette zań jobasynda jumys kúshi artyq óńirlerden Úkimet aıqyndaǵan jumys kúshi tapshy óńirlerge kóshkenderge kólik shyǵyndaryn óteıtin, qyzmettik turǵyn úı nemese jataqhanadan bólme berý, shaǵyn nesıe berýdi quraıtyn áleýmettik paket qarastyrylady.
«Úkimet aıqyndaǵan óńirlerge joǵary oqý oryndary men kolledjderde oqý oryndaryn kóbeıtip, olardyń janynda ornalasqan jataqhanalarda oryn sanyn ulǵaıtyp, aýyl jastary úshin soltústik óńirlerden arnaıy oqý granttaryn uıymdastyrý usynylady», - dedi mınıstr.