Jumys berýshiler shetelde bilim alyp kelgen mamandardy qyzmetke alýǵa múddeli
ASTANA. QazAqparat - Búginde kóptegen jumys berýshiler shetelde bilim alyp kelgen mamandardy qyzmetke alýǵa múddeli. Bul týraly búgin Astanada ótip jatqan "Bilim berý baǵdarlamalar júıesi: ázirleý jáne júzege asyrý" atty konferentsııada "Kásipqor" holdıngi basqarma tóraǵasynyń orynbasary Qadyrbek Bóribekov aıtty.
Onyń aıtýynsha, kelesi jyly Astana men Almaty qalalarynda "Kásipqor" holdıngine qarasty eki kolledj ashylady. Aqtóbe qalasynda bir kolledj jumys jasap tur. Holdıng osy oqý oryndarynda sheteldik mamandarmen birlesip oqý baǵdarlamalaryn jasaýdy qolǵa alǵan.
"Búginde kóptegen jastarymyz shetelderde bilim alýda. Sheteldegi belgili oqý ornyn bitirip kelgen azamattardyń tolyǵymen jumysqa turyp ketýge múmkinshilikteri bar. Óıtkeni olar aldyńǵy qatarly tehnologııalardy, jumysty uıymdastyrý máselelerin biledi. Sondyqtan jumys berýshiler birinshi kezekte osyndaı mamandarǵa basa nazar aýdarady", - deıdi ol.
Onyń aıtýynsha, holdıng osy máseleni sheshýde birqatar jobalardy iske asyrýda. "Degenmen shetelge baryp oqý baǵa jaǵynan óte qymbat. Sondyqtan holdıngke qarasty kolledjderde shetelderdegi aldyńǵy qatarly oqý oryndarynyń professorlary men ustazdary kelip, sabaq beredi. Kelisimshart boıynsha olardyń qasynda bizdiń qazaqstandyq ustazdar bir jyldaı ýaqyt bolyp, tájirıbe jınaqtaıdy. Sabaqtyń barlyǵy aǵylshyn tilinde ótetindikten, bizdiń kolledjderdi támamdaǵan mamandar shetelde oqyp kelgenderden esh kem bolmaıdy", - deıdi Q. Bóribekov.
Mamannyń aıtýynsha, bolashaqta elimizdiń arnaıy maman daıarlaıtyn barlyq orta oqý oryndary osyndaı deńgeıge kóteriledi.
Aıta keteıik, konferentsııaǵa Ulybrıtanııa, Avstrııa, Germanııa jáne basqa da elderdiń kásibı bilim berý salasynyń úzdikteri qatysýda.
