Jumys berýshiler óndiristegi 40-tan astam jazataıym oqıǵany jasyryp qalǵan
Óndiris oryndaryna júrgizilgen tekseris barysynda osyndaı 40-tan astam jaǵdaı anyqtalǵan. Belgili bolǵanyndaı, bul jaǵdaıdyń qalyptasýy birqatar faktorlarǵa baılanysty.
«Birinshiden, quqyqtyq retteý tıimdiliginiń jetkiliksizdigi. Mysaly, jumysshylardyń eńbek quqyqtaryn buzǵany úshin qaralǵan ákimshilik jazalardyń dıapazony tar - eskertýden 400 myń teńgeden aspaıtyn aıyppulǵa deıin (qaıtalaýdy esepke almaǵanda). Bıznes sýbektilerine bul shara asa sezilmeıdi, sondyqtan olardy «tártipke keltirý» ádisteri jumys istemeıdi. Ekinshiden, memlekettik baqylaýdyń jetkiliksizdigi. Ókiletti organdar anyqtaǵan quqyqbuzýshylyqtar aıaqsyz qalady. Prokýrorlyq tekserýler nátıjesi osyny kórsetti»
, - deıdi QR Bas prokýratýrasy Qoǵamdyq múddelerdi qorǵaý qyzmetiniń bastyǵy Saparbek Nurpeıisov.
Aıta ketsek, prokýratýra organdary eńbek qaýipsizdiginiń saqtalýy boıynsha 49 iri kásiporyndy teksergen. Jumysshylarǵa zııandy eńbek jaǵdaılary úshin ótemaqy tólenbeı júrgeni anyqtaldy. Sondaı-aq, qorǵanys quraldarymen jáne azyq-túlikpen qamtamasyz etpeýdiń 2 myńnan astam faktisi tirkeldi. Jumys berýshiler arasynda qyzmetkerlerdi oqytý, mindetti nusqaý berý, saqtandyrý jáne medıtsınalyq tekserýden ótkizý talaptaryn elemeý jıi kezdesedi. Naqtyraq aıtqanda, 5 myńnan jumysshy osy qajettiliktermen qamtylmaǵan.
Tekserý qorytyndysy boıynsha 69 qadaǵalaý aktisi engizilip, 226 tulǵa ákimshilik jaýapkershilikke tartyldy.
30 myń jumysshynyń jalaqysyna ústemeaqy, 600-den astam jumysshyǵa ótemaqy tólendi. Qorǵanys quraldarymen jáne arnaıy tamaqpen qamtamasyz etý bastaldy. 22 tehnıkanyń jumysy toqtatyldy.
Saparbek Nurpeıisov atap ótkendeı, bul másele Bas prokýrordyń erekshe baqylaýynda.
Buǵan deıin habarlanǵandaı, Bas prokýratýra órt, óndiristik jáne sanıtarlyq-epıdemıologııalyq qaýipsizdik salasynda 6,5 myńnan astam zańbuzýshylyqty anyqtady.
