Jumys berýshiler qyzmetkerlerine 1 mlrd teńge qaryz
Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Qazaqstan Respýblıkasynyń Úkimeti eńbek quqyqtarynyń buzylý faktilerin, sondaı-aq jalaqy bereshekterin boldyrmaýǵa qatysty jumystardy kúsheıtip, tıisti sharalar qabyldaýda. Osy jyldyń 5 naýryzyna elimizde jalaqy beresheginiń somasy 2020 jyldyń osy kezeńimen salystyrǵanda (1,1 mln teńge) 62 mln teńgege nemese 4 paıyz tómendep, 1 mlrd teńgeni qurady. Jalaqy bereshegine jol bergen 210 kásiporynnyń basshylaryna memlekettik eńbek ınspektorlary 189 uıǵarym berdi jáne 18,5 mln teńgege aıyppul salynyp, 1,8 myń jumysker aldyndaǵy 814,6 mln teńge somasynda jalaqy bereshegi óteldi.
Jyl basynan beri jalaqy bereshegi boıynsha berilgen uıǵarymdy oryndamaǵan jumys berýshilerge qatysty sot oryndaýshylaryna 718 is joldandy, ol ótken jylmen salystyrǵanda 40 ese kóp», - dedi Asqar Mamın.
Onyń atap ótýinshe, Qazaqstan Respýblıkasynyń eńbek zańnamasynyń saqtalmaýy, onyń ishinde jumyskerlerge jalaqy tólemeý bóliginde shaǵyn jáne mıkrokásipkerlik sýbektilerine qatysty tekserýler taǵaıyndaý algorıtmi bekitilip, jergilikti atqarýshy organdarǵa jumys úshin joldandy.
«Jańa Algorıtmniń ólshemsharttary negizinde jyl basynan bastap 22 shaǵyn jáne mıkrokásipkerlik sýbektisinde jospardan tys tekserýler júrgizildi. Sondaı-aq jalaqy bereshegi bar kásiporyndar, onyń ishinde shaǵyn jáne mıkrokásipkerlik kásiporyndarynyń basshylary algorıtmge sáıkes óńirlerdiń Daǵdarysqa qarsy shtabtary men áleýmettik áriptestik jáne áleýmettik-eńbek qatynastaryn retteý jónindegi úshjaqty komıssııalarynda tyńdalýda», - dedi Úkimet basshysy.
