Jumys berýshiler qyzmetinde eńbek zańnamasynyń talaptaryna sáıkestigin onlaın teksere alady

NUR-SULTAN. QazAqparat - Jumys berýshiler óz betinshe eńbek zańnamasynyń talaptaryna sáıkestigin onlaın tekserýden óte alady. Bul týraly Eńbek jáne halyqty áleýmettik qorǵaý mınıstrliginen málim boldy, dep habarlaıdy QazAqparat.

«QR Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ-men birlesip, pılottyq rejımde «Onlaın eńbek konsýltanty» (OEK) servısin ázirledi jáne iske qosty, ol jumys berýshilerge óz qyzmetin eńbek zańnamasynyń, onyń ishinde eńbek qaýipsizdigi ári eńbekti qorǵaý talaptaryna sáıkestigi turǵysynan tekserýge múmkindik beredi», - delingen mınıstrlik málimetinde.

Servıs jumys berýshilerge eńbek salasyndaǵy qujattamany daıyndaý jáne júrgizý protsesin jeńildetýge ári eńbek zańnamasynyń saqtalýyn qamtamasyz etý boıynsha tsıfrlyq quraldardy engizý esebinen eldiń kásiporyndarynda eńbek jaǵdaılaryn jaqsartýǵa járdemdesýge arnalǵan. OEK-ty paıdalana otyryp, jumys berýshiler eńbek zańnamasynyń qyr-syryn túsine alady, sondaı-aq is-áreketteriniń zańnama normalaryna sáıkestigin anyqtaı alady jáne memlekettik eńbek ınspektsııasy qoıatyn talaptar boıynsha jedel túsiniktemeler ala alady.

«Osy servıs aıasynda tekserý júrgizý jasyryn bolyp sanalady jáne jumys berýshilerden aldyn ala tirkeýdi talap etpeıdi, tek eńbek jaǵdaılary, qyzmetkerler quramy jáne basqa máseleler boıynsha jalpy saýalnamany toltyrý qajet. Tekserý nátıjeleri boıynsha, servıs QR Eńbek kodeksiniń talaptaryn buzýshylyqtardy kórsetýmen qatar, olardy joıý boıynsha usynymdar shyǵarady. Osylaısha, jumys berýshi óz máselelerin OEK kómegimen aldyn ala pysyqtap, barlyq usynystardy ustana otyryp jáne oryn alǵan zań buzýshylyqtardy joıa otyryp, naqty tekserý jaǵdaıynda uıǵarymdar men ákimshilik aıyppuldardan qutyla alady», - dep atalyp ótken vedomstvo aqparatynda.

Qazirgi ýaqytta servıste ózin-ózi tekserýge arnalǵan birneshe túrli taqyryptar bar: jumysqa qabyldaý men eńbek tártibinen bastap eńbek qaýipsizdigi jáne eńbekti qorǵaý talaptaryna, sondaı-aq qyzmetkerlerdiń jekelegen sanattary úshin eńbek erekshelikterine deıin.

Saýalnamalar 12 taqyryptyq tekserý paraǵyna ornalastyrylǵan jáne jumys berýshilerge zań buzýshylyqtardyń aýyrlyǵyn anyqtaýǵa kómektesetin 80-ge jýyq suraqtan turady.

Servıs kelesi silteme boıynsha qoljetimdi: https://inspector.enbek.kz. https://enbek.kz portalda tıisti banner ornalastyrylǵan.