Jumys berýshiler Áleýmettik medıtsınalyq saqtandyrý qoryna 2017 jyldan bastap eńbekaqynyń 2 paıyzyn aýdara bastaıdy
ASTANA. QazAqparat - Jumys berýshiler Áleýmettik medıtsınalyq saqtandyrý qoryna 2017 jyldan bastap eńbekaqynyń 2 paıyzyn aýdara bastaıdy. Bul týraly búgin Parlament Májilisinde «Mindetti áleýmettik medıtsınalyq saqtandyrý týraly» zań jobasy boıynsha baıandaǵan Densaýlyq saqtaý jáne áleýmettik damý mınıstri Tamara Dúısenova málim etti.
Atalǵan zań jobasy Memleket basshysynyń medıtsınalyq saqtandyrý júıesin engizý týraly tapsyrmasyna oraı ázirlengen. Bul rette zań jobasy mindetti áleýmettik medıtsınalyq saqtandyrý jeke jáne qoǵamdyq densaýlyq úshin memlekettiń, jumys berýshiler men azamattardyń yntymaqty ortaq jaýapkershiligi tetigin engizýge, densaýlyq saqtaý salasynda qazirgi zamanǵy naryqtyq tetikterdi qamtýǵa baǵyttalǵan.
«Azamattarǵa kórsetiletin medıtsınalyq kómektiń eki paketi belgilenip otyr. Onyń birinshisi, bazalyq paket nemese memleket tarapynan kepildendirilgen medıtsınalyq kómek. Bul paket azamattardyń konstıtýtsııalyq quqyǵyn qamtamasyz etýdi kózdeıdi jáne tolyqtaı respýblıkalyq bıýdjet esebinen qarjylandyrylady. Sondaı-aq bul kómek túrleri Qazaqstannyń barlyq azamattary men oralmandary úshin qoljetimdi bolady», - deıdi mınıstr Tamara Dúısenova.
Ekinshiden, mindetti áleýmettik medıtsınalyq saqtandyrý júıesi esebinen qarjylandyrylatyn qosymsha paket kózdeledi. Bul bazalyq paketke kirmeıtin qosymsha medıtsınalyq kómek túrlerin qamtıdy.
«Qosymsha paket tek mindetti Áleýmettik medıtsınalyq saqtandyrý júıesine qatysýshy azamattarǵa tıesili bolmaq. Mindetti áleýmettik medıtsınalyq saqtandyrý júıesi memlekettiń, jumyspen qamtýshynyń jáne jumys berýshiler men ózin-ózi eńbekpen qamtyǵan azamattardyń mindetti saqtandyrý tólemderinen qurylatyn bolady. Bul rette jumys berýshiler óz jumysshylary úshin eńbekaqy qorynan bes paıyz, jumysshylar 2 paıyz, ózin-ózin eńbekpen qamtamasyz etýshiler kórsetilgen tabysynan 7 paıyz jarna tóleıtin bolady. Qazirgi ekonomıkalyq jaǵdaıǵa baılanysty jarnalar 2017 jyldan bastap birtindep ósedi», - deıdi T. Dúısenova.
Mınıstrdiń sózine qaraǵanda, mindetti tólemderdi shoǵyrlandyrý úshin kommertsııalyq emes aktsıonerlik qoǵam nysanynda áleýmettik medıtsınalyq saqtandyrý qory qurylady. Bul rette jumys berýshilerdiń atalǵan Qorǵa tólenýge jatatyn aýdarymdarynyń mólsheri 2017 jylǵy 1-qańtardan bastap aýdarymdar esepteletin obektiniń - 2 paıyzyn, 2018 jyldan bastap - 3 paıyzyn, 2019 jyldan - 4 paıyzyn, 2020 jyly 5 paıyzyn quraıdy. Al jumysshylardyń qorǵa aýdaratyn tólemderi 2019 jyldyń qańtarynan bastap - 1 paıyzyn, 2018 jyldan bastap 2 paıyzyn quramaq.
