Jumys berýshi tóleıtin 5 paıyzdyq zeınetaqy jarnasy qyzmetkerdiń menshigi bolady

NUR-SULTAN. QazAqparat – Zeınetaqy júıesin odan ári jańǵyrtýdyń 2030 jylǵa deıingi tujyrymdamasyna 2023 jyldan bastap jumys berýshiler tóleıtin 5 paıyzdyq mindetti jarnany qyzmetkerdiń jeke menshigi retinde bekitý usynylyp otyr, dep habarlaıdy QazAqparat tilshisi.

Bul týraly QR Eńbek jáne halyqty áleýmettik qorǵaý mınıstrliginiń Áleýmettik saqtandyrý, bazalyq, áleýmettik jáne zeınetaqymen qamsyzdandyrý saıasaty departamentiniń dırektory Vıktorııa Shegaı aıtty.

«Bul jerde jumys isteıtin uıymdardyń bári, sonyń ishinde memlekettik, kvazımemlekettik sektor, jeke sektor týraly aıtyp otyrmyz. Ókinishke qaraı, búgingi tańda álemde keńinen taralǵan halyqaralyq tájirıbeniń bolýyna qaramastan, jumys berýshi óz qyzmetkerlerin zeınetaqymen qamtamasyz etýge is júzinde qatyspaıdy. Bul fakt. Memleket, adamnyń ózi jáne jumys berýshi arasynda jaýapkershilikti bóletin teńdestirilgen júıeni is júzinde qurý úshin biz ony zeınetaqy júıesinde de ornatýdy usynyp otyrmyz», - dep túsindirdi sarapshy.

5% jarna 2023 jyldyń qańtarynan bastap engizilmek. Mınıstrlik ókili bul merzim buǵan deıin 2 ret shegerilgenin eske saldy.

«Іs júzinde bul túzetýler zańnamalyq deńgeıde qabyldanyp qoıǵan. Negizi, 2018 jyly qoldanysqa enýi kerek edi. Ol kezde mindetti áleýmettik-medıtsınalyq saqtandyrý qoryna jumys berýshilerdiń jarna tóleıtini eskerilip, 2020 jylǵa shegerilgenin bilesizder. Ol kez pandemııaǵa dóp keldi de, norma endi 2023 jyldyń 1 qańtarynan kúshine enetin bolyp otyr. Tujyrymdama jobasy aıasynda biz qandaı ózgerister qarastyryp jatyrmyz? Biz zeınetaqy jınaqtaýshylardyń shotyna aýdarylatyn jarnalardyń mólsheri men búkil mehanızmdi túgel kórsetemiz. Buǵan deıin tujyrymdamada jarnalardyń 5%-y tólem aýdarylmaǵan qyzmetkerdiń menshigi emes dep qarastyrylsa, biz usynyp otyrǵan ózgerister boıynsha ony árbir qyzmetkerdiń jeke jınaqtaryn tolyqtyrýshy jarna retinde qaraýdy usynalyp otyr», - deıdi Vıktorııa Shegaı.

ıAǵnı, jumys berýshi aýdarǵan 5 paıyzdyq zeınetaqy jarnasy qyzmetkerdiń menshigi bolmaq.

«Tólem kim úshin júrgizilse, sonyń paıdasyna jarnalar jeke zeınetaqy shotynda kórsetiletin bolady. Bul is júzinde onyń menshigi bolady, oǵan belgili bir jaǵdaılarda qol jetkizýge quqyly. Sonyń biri - jalpyǵa birdeı belgilengen zeınetkerlik jasqa jetý», - dep atap ótti mınıstrlik mamany.

Onyń aıtýyna qaraǵanda, qyzmetkerler zeınetaqy shottaryna tıisti jarnalardyń túsip turýyna múddeli bolýy kerek.

«Tıisti tapsyrmalar boıynsha, zeınetaqy jınaqtarynyń bir bóligin paıdalaný quqyǵy berilip, bul azamattardyń zeınetaqy júıesine degen senimin arttyrdy. Jeke shottan úzindi-kóshirmeni qaraý úshin ótinishterdiń sany qanshalyqty artqanyn kórip otyrmyz. Bizde azamattar úshin tólem ýaqtyly júrgizilmegende nemese ol múldem júrgizilmegende ótinishter sany artty», - deıdi Vıktorııa Shegaı.