Jumys berýshi saılaýǵa barǵany týraly esepti qyzmetkerden talap ete ala ma

NUR-SULTAN. QazAqparat - Jumys berýshiniń qol astyndaǵy qyzmetkerlerden saılaýǵa qatysqan-qatyspaǵany týraly esepti talap etýi zańsyz. Bul týraly búgin elordada prezıdenttik saılaý aldyndaǵy úgit-nasıhat kezeńiniń qorytyndysyna arnalǵan sharada aıtyldy, dep habarlaıdy QazAqparat tilshisi.

Qylmystyq is júrgizý quqyǵyna mamandanǵan zań ǵylymdarynyń doktory Marat Qoǵamov jumys berýshi óz qyzmetkerlerinen saılaýǵa qatysqany týraly qandaı da bir esep talap ete almaıtynyn eskertti.

«Saılaýda daýys berý, bermeý - ár azamattyń jeke quqyǵy. Sondyqtan, odan saılaýǵa barǵany týraly foto-esep pen qandaı da bir túsinikteme talap etý zańsyz. Tipti kimge daýys bergenin suramaı-aq, jaı ǵana saılaýǵa qatysqan-qatyspaǵany týraly esepti talap etý saılaý týraly zańnamany buzý bolyp sanalady», - deıdi zańger.

Marat Qoǵamov ondaı jaǵdaıǵa tap bolǵan azamattar prokýratýraǵa nemese sot oryndaryna shaǵymdana alatynyn aıtady.

«Jumys berýshi osyǵan uqsas negizsiz talaptar qoısa, prokýratýraǵa jazbasha shaǵym túsirýge bolady. Al prokýratýra ókilderi bul shaǵymǵa bir saǵattyń ishinde áreket etýge mindetti. Ondaı zańbuzýshylyqqa jol bergen laýazymdy tulǵa tipti, qylmystyq jaýapqa tartylýy da múmkin», - deıdi ol.