Jumyrtqa óndirisine sýbsıdııalar normatıvi eki ese artady - AShM

NUR-SULTAN. QazAqparat – Álemdik azyq-túlik naryqtaryndaǵy turaqsyz jaǵdaıǵa baılanysty jáne otandyq qus fabrıkalaryn qoldaý, ishki naryqtyń turaqtylyǵyn saqtaý maqsatynda Aýyl sharýashylyǵy mınıstrligi jumyrtqa óndirýshilerdi qoldaý kólemin ulǵaıtý týraly sheshim qabyldady. Bul týraly Túrkistan oblysynda ótken respýblıkalyq semınar-keńeste vedomstvo basshysy málimdedi, dep habarlaıdy QazAqparat mınıstrlikke silteme jasap.

Aýyl sharýashylyǵy mınıstrligi asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalaryna taǵamdyq jumyrtqany sýbsıdııalaýdy engizý bóliginde ózgerister men tolyqtyrýlar engizip otyr.

Osylaısha, ereje jobasynda jumyrtqa óndirisiniń qunyn arzandatýǵa arnalǵan sýbsıdııalar normatıvin eki ese ulǵaıtý kózdelgen, ol qus fabrıkasynyń qýatyna qaramastan, bir danasyna - 3 teńge bolady.

Bul qoldaý sharasymen elimizdiń barlyq jumyrtqa qus fabrıkalary qamtylady, olardy sýbsıdııalaýǵa 6,5 mlrd teńge bólinedi.

Aıta ketsek, respýblıkada 63 qus fabrıkasy bar, onyń ishinde 29-y et jáne 34-i jumyrtqa baǵytynda. 2021 jyldyń qorytyndysy boıynsha otandyq qus fabrıkalary soıys salmaqta 266,8 myń tonna qus etin óndirdi, bul - jalpy óndiris kóleminiń 98%-yn quraıdy. Taýyq jumyrtqasy 3,5 mlrd dana nemese jalpy óndiristiń 74%-y óndirildi. Qus etimen qamtamasyz etý 66%, ımport úlesi 45%-dan 39,5%-ǵa deıin tómendedi. El taǵamdyq jumyrtqamen 98% qamtamasyz etilgen.

Buǵan deıin AShM fermerlerdiń egis naýqanyna qajetti resýrstarmen qamtamasyz etilgenin málimdedi.