Jumyrtqa maskasy: terini tazalaıdy, tartady, jumsartady
ASTANA. QazAqparat - Jastyq pen teri saýlyǵyn árdaıym baqylaýda ustaý úshin túrli maskalar jasap turýdyń mańyzy mol. Al jumyrtqadan jasalatyn bul maska bet terisin tazalaıdy, jumsartady, nárlendiredi jáne tartyp turady. Sonymen qatar eń arzan, qoljetimdi maska bolyp esepteledi. Óıtkeni sizge keregi tek jumyrtqa ǵana, dep jazady anabol.kz.
Jumyrtqanyń aǵy terini tazalap, tartyp turatyn bolsa, sarysynda teriniń syrtqy qabatyn tereńnen tazalap, jumsartyp turatyn letsıtın kóp mólsherde kezdesedi. Sondaı-aq jumyrtqanyń quramyndaǵy A, D, V dárýmenderi teriniń jas qalpyn saqtaýǵa septigin tıgizedi. Sondyqtan da jumyrtqa maskasyn kez kelgen jastaǵy qyz-kelinshekterdiń jasaýyna bolady.
Sizge keregi:
1 jumyrtqa
qaǵaz maılyq (salfetka)
shanyshqy
2 ydys
Jasalýy:
Jumyrtqanyń aǵy men sarysyn bólip alyńyz.
Aǵyn azdap aralastyryp, betińizge jaǵyp, onyń syrtynan qaǵaz maılyqty qajet mólsherde kesip, jabystyryńyz. Odan keıin betińizge jabysyp turǵan qaǵazdardyń syrtynan taǵy bir ret jumyrtqanyń aǵyn jaǵý kerek. Biraq tym kóp jaǵýdyń qajeti joq.
Jumyrtqa jaqsylap kepken soń, ıaǵnı 20-30 mınýttan keıin maskany tómen, ıaǵnı ıek jaǵyńyzdan bastap, joǵary, mańdaıǵa qaraı eppen tarta otyryp, alyp tastańyz. Maskany alyp jatqanda azdap aýyrý sezimi bolýy múmkin. Degenmen, jumyrtqa maskasynyń nátıjesin kórgende-aq ol týraly umytyp ta ketesiz!
Maskany alǵannan keıin baǵana bólip qoıǵan jumyrtqanyń sarysyn aralastyryp, betińizge jaǵyńyz. Al onyń kúshi áldeqaıda arttyrý úshin oǵan birneshe tamshy záıtún nemese kokos maıyn qosýǵa bolady.
10 mınýttan keıin betińizdegi jumyrtqanyń sarysyn jyly sýmen jýyp tastańyz.
Eger bet terisi qurǵaq bolsa, dereý nárlendiretin krem jaqqanyńyz jón.
Mundaı maskany aptasyna 2 ret jasap turǵan artyq bolmaıdy.
