Jumyldyrý ázirligin arttyrýǵa baǵyttalǵan qujat qabyldandy - Parlament
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jumyldyrý daıyndyǵy men jumyldyrý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi talqylady.
Zań jobasy memlekettik organdardyń, sondaı-aq jumyldyrý tapsyrystary bar uıymdardyń jumyldyrý daıyndyǵy júıesin jetildirýge baǵyttalady. Aıta keterligi, Qazaqstan Respýblıkasynyń qoldanystaǵy áskerı doktrınasynda jumyldyrý daıyndyǵynyń birqatar negizgi mindetteri aıqyndalǵan. Sonymen qatar qujatta memlekettiń jumyldyrý ázirligin arttyrý sharalary kózdeledi. Osyǵan baılanysty zań jobasyndaǵy ózgerister soǵys jaǵdaıy men soǵys ýaqyty kezeńinde memleketti turaqty basqarýdy júzege asyrýǵa múmkindik beretin normalardy qamtyp otyr. Bul rette zań jobasynda «memlekettik organdardyń jumyldyrý jospary», «ákimshilik aýmaqtaǵy jumyldyrý jospary» degen uǵymdar bekitý bóligine ózgerister engizilgen. Sonymen qatar qoldanystaǵy zańnamaǵa sáıkes, uıymdardyń jumyldyrý, soǵys jaǵdaıy men soǵys ýaqytynda memlekettik qorǵanys múddesine memlekettik tapsyrystar men tapsyrmalardy oryndaýdan bas tartýǵa quqyǵy bolmaıdy. Osyǵan baılanysty qujatta «taýarlar óndirý, jumystardy oryndaý jáne qyzmetter kórsetýdiń tıisti kezeńge arnalǵan jospary» degen uǵymdar bóligine ózgerister engizilgen. Aıta keterligi, zań jobasyn qaraý barysynda senatorlar qujatty jańa tarmaqpen tolyqtyrǵan bolatyn. Onda negizinen memlekettik rezervtiń debıtorlyq bereshegin esepten shyǵarý qaǵıdalaryn naqtylaý qarastyrylady. Joǵary palatanyń bul usynysyna Májilis kelisimin berip, qujatty qabyldaý týraly sheshim shyǵardy.
