«Jumystyń berekesin ketirgender boldy»: Toqaev jas sheneýnikterdi synǵa aldy
ASTANA. KAZINFORM – Memleket basshysy Qasym-Jomart Toqaev jastarǵa senim artyp, olarǵa jaýapty qyzmetterdi júkteý qajet ekenin aıtty. Bul rette Prezıdent Úkimette joǵary laýazym atqarǵan keıbir jastar júktelgen mindetti múltiksiz oryndaı almaǵanyn eske salyp, mundaı jaǵdaıǵa jol bermeý qajettigin atap ótti.
Bul týraly Prezıdent Táýelsizdik saraıynda ótken BAQ ókilderimen brıfıngte pikir bildirdi.
– Siz Memleket basshysy retinde jastarǵa senim artyp, olarǵa udaıy qoldaý kórsetip kelesiz. Quryltaı depýtattyǵyna úmitkerler arasynda túrli salada jemisti eńbek etip júrgen jastar bar. Sizdiń oıyńyzsha, olar Quryltaı jumysyna serpin bere ala ma? – dep suraq qoıdy jýrnalıst.
– Ony kóre jatarmyz. Biz jastarǵa senim artamyz. Olardy kezinde túrli laýazymdarǵa taǵaıyndadyq. Úkimette joǵary qyzmet atqarǵan jastardyń bári ózine júktelgen mindetti múltiksiz oryndady dep aıta almaımyn. Árıne, túrli kedergi men sebep kezigip jatady, – dep jaýap berdi Memleket basshysy.
Degenmen Prezıdent jastarǵa senim artyp, jaýapkershilik júkteý keregin, onsyz bolmaıtynyn basa aıtty.
– Qazaqstan – demografııa turǵysynan jas memleket. Sondyqtan jastarǵa zor senim artamyz. Olar da buǵan daıyn bolýǵa tıis. Áıtpese, kezinde mınıstr bolyp, Úkimetke kelgen soń jumystyń berekesin ketirgender de boldy. Buǵan jol bermeýimiz kerek, – dedi Qasym-Jomart Toqaev.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde daýys berdi.
Buǵan deıin Prezıdent «Vıtse-prezıdent kim bolady?» degen suraqqa jaýap bergen edi.
