Jumystarynyń ǵylymı dáleli joq — Sý mınıstri Altaı Aınabektiń úndeýine jaýap berdi
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov el ishinde Araldy sýǵa toltyrǵan «jańbyr adam» retinde tanylyp ketken Altaı Aınabektiń ońtústik óńirlerdi qýańshylyq bolatyny týraly dabylyna jaýap berdi.
«Jańbyr adamnyń» úndeýi
Áleýmettik jelide Altaı Aınabektiń bir top adammen birge Úkimetke joldaǵan úndeýi tarap júr. Vıdeoda bir top azamat Úkimetten Altaı Aınabektiń ońtústik óńirlerdi jazda bolýy múmkin qýańshylyqtan qutqarýyna qoldaý kórsetip, qoldan jańbyr jaýǵyzatyn tehnologııasyn iske asyrýǵa atsalysýyn suraıdy.
Astanada ótip jatqan Qazaqstannyń sý sektoryn damytý jónindegi úılestirý keńesi otyrysy kezinde jýrnalıst mınıstrge osy málimdeme týraly suraq qoıdy.
— Ol azamattyń tarapynan istelip jatqan jumystardyń eshqandaı ǵylymı dáleli joq. Bizdiń tarapymyzdan usynys bolǵan. Ózimizdiń Taraz qalasynda ornalasqan ǵylymı-zertteý ınstıtýtynyń mamandarymen birge júrip, ǵylymı túrde dáleldeý máselesin qoıǵanbyz. Biraq búginde ol sheshimin tapqan joq, — deıdi mınıstr.
Mınıstrliktiń usynysy
Nurjan Nurjigitov Altaı Aınabek bastaǵan azamattardyń eldiń ońtústik óńirlerinde bıyl jazda qýańshylyq bolady degen dabylyna da jaýap berdi.
— Ońtústik óńirlermen irgeles jatqan elderdiń de deregin zerttep otyrmyz. Ortaq boljam boıynsha normanyń 87 paıyzy kóleminde sý bolady. Byltyr 89 paıyz bolǵan. Sonda byltyrǵydan 2 paıyz ǵana tómen degen sóz. Bul — «Qazgıdromettiń», «Ýzgıdromettiń» «Qyrǵyzgıdromettiń» boljamdaryna negizdelgen boljam. Biz vegetatsııalyq kezeńge josparlaǵan mólsherde sý jınaqtaı aldyq. 1 sáýirdegi jaǵdaı boıynsha, sý qoımalarynda jınalǵan ylǵaldyń kólemi byltyrǵymen salystyrǵanda 1 mlrd 388 mln tekshe metr artyq. Muny bizdiń rezerv deýge bolady. Osy faktorlardyń bárin eskere otyryp, vegetatsııa byltyrǵy deńgeıde ótedi dep boljap otyrmyz, — dedi vedomstvo basshysy.
Eske salsaq, byltyr da Altaı Aınabektiń bultty ıondaý arqyly jańbyr jaýǵyzý jobasynyń aıasynda qyzý pikirtalas bolǵan edi.