Jumysta júrip múgedek bop qalǵan aqtóbelik 12 jyldan soń ótemaqy óndirip aldy

AQTÓBE. KAZINFORM – Aqtóbe qalasynyń №3 sotynda qurylysta júrip, múgedek bolyp qalǵan jumysshynyń aryzy qaraldy. Ol jumys berýshiden 6 mln teńge óndirip aldy.

Aqtóbe qalasynyń turǵyny óndiristik jaraqat alyp, moraldyq shyǵyndy óteý jóninde shaǵym túsirdi. Іs Aqtóbe qalasynyń №3 sotynda qaraldy. Іs materıalyna súıensek, talap qoıýshy qurylys jumystaryn júrgizý kezinde bıikten qulap, úshinshi toptyń múgedegi bolyp qalǵan. Óz kezeginde jaýapker talap aryzben kelispeı, talap qoıý merzimin qaıta qaraýdy surady. Sebebi oqıǵa 2012 jyly bolyp, qala turǵyny arada 12 jyl ótkende ǵana shaǵym túsirip tur.

- Sot otyrysynda saraptama taǵaıyndalyp, onyń densaýlyǵyna aýyr túrde zııan kelgeni dáleldendi. Sot anyqtalǵan mán-jaılardy qorytyndylaı kele, talap zańdy negizdi dep eseptedi. Azamattyq kodekstiń 187-babynyń 1-bóligine sáıkes azamattyń densaýlyǵyna keltirilgen zııannyń ornyn toltyrý týraly talaptarǵa merzim qoldanylmaıdy. Sondyqtan jaýapkerdiń talap qoıý merzimin qoldaný týraly ótinishi qanaǵattandyrýsyz qaldyrdy. Sot sheshimimen talap qoıýshynyń paıdasyna 6 mln teńge mólsherinde moraldyq zııan óndirildi, - dep habarlady Aqtóbe qalasy №3 sotynyń baspasóz qyzmeti.

Sheshim zańdy kúshine endi.