Jumysta bastyqpen bolǵan dıalogty onyń ruqsatynsyz dıktofonǵa jazýǵa bola ma
ÓSKEMEN. KAZINFORM — Jumys barysynda basshymen bolǵan áńgimeni onyń ruqsatynsyz dıktafonǵa jazýǵa bola ma? Mundaı jazbany keıin eńbek daýy nemese sot protsesinde dálel retinde paıdalana alasyz ba? Kazinform tilshisi bul saýaldardyń jaýabyn zańgerden bilip kórdi.
Zańger Alekseı Bojkovtyń aıtýynsha, áńgimeni ekinshi tarapqa eskertpeı aýdıoǵa jazyp alý keıin quqyqtyq máseleler týyndatýy múmkin. Ásirese jazba qandaı da bir daýda nemese sotta dálel retinde usynylsa, onyń qashan, qandaı jaǵdaıda jáne qandaı maqsatta jasalǵany mańyzdy.
— Eger biz áńgimeni bastapqyda ekinshi adamǵa eskertpeı jazyp alsaq, keıin ony qandaı da bir daýda dálel retinde paıdalanǵan kezde jazbanyń qalaı jáne qandaı jaǵdaıda alynǵanyn túsindirýge týra keledi. Mysaly, aýdıojazba jarııalanyp, soǵan baılanysty sotqa júginse, onyń zańdy jolmen alynǵanyn dáleldeý máselesi týyndaýy múmkin, — deıdi ol.
Zańger óz sózinde aýdıojazbanyń sotta dálel retinde qabyldanýy avtomatty túrde sheshilmeıtinin jetkizdi. Sot onyń iske qatystylyǵyn, alyný jaǵdaıyn, zań talaptaryna sáıkestigin jáne shynaıylyǵyn baǵalaıdy. Sondyqtan ekinshi taraptyń jazbaǵa qarsylyq bildirýi de sot barysynda onyń jol beriletin dálel retinde baǵalanýyna qatysty másele týyndatýy múmkin.
Bul rette aýdıojazbany jasaý men ony keıin jarııalaý — eki bólek quqyqtyq másele.
— Eger basshy tarapynan zańsyz talap qoıyldy dep esepteseńiz, máseleni quqyqtyq jolmen sheshe alasyz. Mysaly, tıisti organdarǵa júginýge nemese eńbek qatynastary sheńberinde óz quqyqtaryńyzdy qorǵaýǵa bolady. Al áńgimeni jazyp alyp, keıin ony jarııalaý — bólek másele. Jarııalanǵan materıaldyń mazmunyna, adamnyń quqyqtary men zańmen qorǵalatyn múddelerine qatysty qosymsha quqyqtyq suraqtar týyndaýy múmkin, — deıdi Alekseı Bojkov.
Onyń aıtýynsha, eger adam mańyzdy áńgimeni aýdıojazbaǵa túsirgisi kelse, sóılesip otyrǵan adamǵa bul týraly aldyn ala habarlaǵan jón.
— Áńgime jazylatynyn aldyn ala eskertken durys. Eger ekinshi tarap buǵan kelispese, onda áńgimeni jalǵastyrý nemese odan bas tartý týraly sheshim qabyldaýǵa bolady. Bul keıin jazbanyń qalaı alynǵanyna qatysty daýdy boldyrmaýǵa múmkindik beredi, — dep túsindirdi zańger.
Alekseı Bojkov jumys barysynda týyndaǵan kelispeýshilikterdi sheshý úshin qoldanystaǵy zańnamada kózdelgen quqyqtyq tetikterdi paıdalanýǵa keńes beredi. Al aýdıojazbany dálel retinde nemese jarııa túrde qoldaný máselesinde onyń jasalý jaǵdaıy men keıingi paıdalaný maqsatyn eskerý qajet.
Eske sala ketsek, buǵan deıin júrgizýshi aıyppuldyń kúshin qalaı joıa alatyny týraly zańger keńesin jazǵan bolatynbyz.
