Jumyssyzdarǵa proaktıvti túrde bos jumys oryndary usynylady

ASTANA. KAZINFORM – Endi elimizde jumyssyzdyq mártebesi avtomatty túrde anyqtalady. Bul týraly Tsıfrlyq damý, ınnovatsııalar jáne aeroǵarysh ónerkásibi birinshi vıtse-mınıstri Qanysh Tóleýshın búgingi Úkimet otyrysynda aıtty.

Onyń aıtýynsha, tsıfrlyq transformatsııa protsesinde azamattyń eńbek qyzmetiniń tolyq tsıkline kóńil bólindi. Jumyspen qamtý baǵdarlamalaryna joldama berýden bastap, jumysynan aıyrylý, júkti bolý, bosaný jáne bala asyrap alý kezinde kómek kórsetý, zeınetaqy tólemderin tirkeýge deıingi barlyq negizgi kezeńderi qarastyryldy.

Bul tásil jumys jolynyń basynan zeınetkerlikke shyqqanǵa deıingi barlyq kezeńderdegi qyzmetti qoljetimdi etetin tutas tsıfrlyq traektorııany qurýǵa múmkindik berdi.

– Mysaly jumys izdegen azamattardy tirkeý bastamasy bar. Buryn jumys izdeý men jumysqa ornalasý azamattardyń derbes áreketine negizdeletin. Bos jumys oryndaryn izdeý qolmen júrgizildi, bul aıtarlyqtaı ýaqyt pen eńbek shyǵyndaryn talap etti. Al qazir memlekettik derekterdiń ıntegratsııasyna jáne jumyssyzdyq mártebesin avtomatty túrde anyqtaýǵa kóshý júrip jatyr. Endi júıe azamattarǵa qolmen izdeý qajettigin joıyp, qolaıly bos oryndardy proaktıvti túrde usynady, – dep túsindirdi Qanysh Tóleýshın.

Sonymen birge, asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndaý protsesi otbasy úshin qıyndyqtarmen qatar júretin.

– Jaqynynan aıyrylý jáne kúızelis jaǵdaıynda otbasy músheleri kóp ýaqyt alatyn qajetti qujattardy jınaýǵa májbúr boldy. Jańa tásildi engizý arqyly qyzmetti usynýdyń proaktıvti modeli iske asyryldy. Nátıjesinde qyzmet kórsetý merzimi 7 kúnnen 1 kúnge deıin qysqartyldy, – Q. Tóleýshın.

Aıta keteıik, elimizde zeınetaqy da avtomatty túrde taǵaıyndalatyn boldy.