Jumyssyz retinde tirkelý jumys tabýǵa qanshalyqty kómektesedi
ALMATY. KAZINFORM – Jumyssyz retinde tirkelýdiń qandaı paıdasy bar? Bul suraqqa Almaty qalasy Eńbek mobıldiligi ortalyǵynyń mamandary jaýap berdi.
Elimizde jumystan óz erkimen ketken ne belgili bir sebeptermen shyǵyp qalǵan adamdar jumyssyz retinde tirkelmeı, jańa jumys ornyn óz betinshe izdeýdi jón kóredi. Alaıda Almaty qalasy Eńbek mobıldiligi ortalyǵynyń málimetinshe, mundaı mártebe alýdyń paıdasy bar jáne ol jańa múmkindikterge jol ashady.
Aldymen azamat Eńbek mobıldiligi ortalyǵyna júginip ne enbek.kz elektrondyq eńbek bırjasy arqyly jumyssyz retinde tirkelýi qajet. Sol arqyly ol qysqa merzimdi kásibı oqýǵa joldama alyp, jańa mamandyqty meńgere alady. Sondaı-aq jumys berýshiler tarapynan turaqty jumysqa ne sýbsıdııalanǵan jumys oryndaryna joldama alýy múmkin.
Odan bólek jumysynan aıyrylǵan jaǵdaıda tólenetin áleýmettik tólemderge ótinim berýine bolady. Ony taǵaıyndaý úshin mindetti áleýmettik saqtandyrý júıesine qatysýy jáne jumyssyz retinde resmı tirkelý qajet. Tólemdi alýǵa ótinishti jumyssyz retinde tirkelgen kezde enbek.kz jáne egov.kz portalynda nemese mansap ortalyǵynda jáne ekinshi deńgeıli bankterdiń mobıldi qosymshasy arqyly berý qajet.
Almaty qalasy Eńbek mobıldiligi ortalyǵynyń málimetinshe, jyl basynan beri 56 638 azamat jumyssyz retinde tirkeýge turǵan. Qazirgi deıin olardan 25 367 adam turaqty jáne ýaqytsha jumystarǵa ornalastyryldy. Al 2024 jyly Almatyda 49 840 adam jumyssyz retinde tirkelip, keıin 26 304 adam jumysqa ornalasqan.
– Qazirgi tańda Almaty qalasy boıynsha jumyspen qamtýǵa járdemdesýdiń belsendi sharalarymen 19 737 azamat qamtyldy. Onyń ishinde: jastar praktıkasyna – 707 adam, áleýmettik jumys oryndaryna – 499 adam, «Kúmis jas» jobasyna – 577 adam, qoǵamdyq jumystarǵa – 9 165 adam, «Altyn jas» jobasyna – 487 adam, kásibı oqytýǵa – 906 adam, skills.enbek.kz platformasy arqyly onlaın oqytýǵa – 4 240 adam, kásipkerlik bastamalarǵa járdemdesýge – 3 156 adam tartyldy, - dep habarlady ortalyqtan.
Eske salaıyq, buǵan deıin Almatyda qandaı mamandyqtarǵa suranys artyp, qandaı saladaǵy mamandarǵa suranys tómendegenin jazǵanbyz.