Jumyssyz qazaqstandyqtarǵa memleketten tólem beriledi

ASTANA. KAZINFORM – Qazaqstandyqtardyń jumystan shyǵyp qalý sebepterine qaramastan mindetti áleýmettik saqtandyrý qorynan tólem alý múmkindigi bar. Tólem týraly tolyǵyraq Eńbek jáne halyqty áleýmettik qorǵaý mınıstrligi mindetti áleýmettik saqtandyrý qory joldamalardy qaraý departamentiniń dırektory Samal Toqsanǵazına túsindirdi. 

 – Ýaqytsha jumyssyz júrgen qazaqstandyqtar úshin memlekettik áleýmettik saqtandyrý qorynan tólem qarastyrylǵan. Ony taǵaıyndaý úshin mindetti áleýmettik saqtandyrý júıesine qatysý jáne jumyssyz retinde resmı tirkelý qajet. Tólem jumystan shyǵý sebebine qaramastan tólenedi jáne jumyssyz adamdy jumys izdep júrgen kezeńde qoldaýǵa arnalǵan, - dedi Samal Toqsanǵazına. 

Onyń aıtýynsha, tólem mólsheri ár adamǵa jeke esepteledi. 

– Jumysshynyń keıingi eki jyldaǵy kirisine jáne memlekettik áleýmettik saqtandyrý júıesine qatysý ótiline baılanysty. Tólem merzimi – 1 aıdan 6 aıǵa deıin. Tólemdi alýǵa ótinishti jumyssyz retinde tirkelgen kezde enbek.kz jáne egov.kz portalynda nemese mansap ortalyǵynda jáne ekinshi deńgeıli bankterdiń mobıldi qosymshasy arqyly berý múmkindigi bar. Odan bólek halyqqa qyzmet kórsetý ortalyǵy arqyly da ótinish bere alasyz. Eske salatyn jaıt, ótinishti jumyssyz retinde tirkelgennen kúnnen bastap 12 aı ishinde alýǵa bolady. Siz úshin qorǵa tólengen áleýmettik aýdarymdardy enbek.kz portaly, ekinshi deńgeıli bankterdiń mobıldi qosymshasy arqyly jáne halyqqa qyzmet kórsetý ortalyǵynan bilýge bolady, - deıdi ol. 

Eske sala ketsek, elimizde jyl basynan beri 4,7 mln adamǵa áleýmettik tólem berildi. 

Bıyl maýsymdaǵy málimet boıynsha qazaqstandyqtar 310 mlrd teńge somada járdemaqy men áleýmettik tólem alǵan.