Jumyssyz qalǵandarǵa tólenetin járdemaqy merzimi qysqarýy múmkin
ASTANA. KAZINFORM — Qazaqstanda jumyssyz qalǵan azamattarǵa jumys tabýǵa jáne turaqty jumyspen qamtylýǵa kómektesetin birqatar qoldaý sharasy qarastyrylǵan.
Eńbek jáne halyqty áleýmettik qorǵaý mınıstrliginiń baspasóz qyzmetiniń habarlaýynsha, olardyń qatarynda jumys izdeýge járdemdesý, kásiptik oqytý, sýbsıdııalanatyn jumys oryndaryna ornalastyrý jáne tıisti talaptarǵa saı bolǵan jaǵdaıda jumysynan aıyrylýyna baılanysty áleýmettik tólem taǵaıyndaý bar.
Eń aldymen azamat jumys izdeýshi retinde tirkelýi kerek. Bul úshin turǵylyqty jerindegi Mansap ortalyǵyna júginýge nemese elektrondyq úkimet portaly men Enbek.kz arqyly tirkelýge bolady.
Tirkelgennen keıin Mansap ortalyǵy azamattyń mamandyǵy, eńbek ótili, biliktiligi, qalaǵan jalaqysy jáne basqa da talaptaryn eskere otyryp, sáıkes bos jumys oryndaryn usynady.
— Eger laıyqty jumys birden tabylmasa, azamat jumyssyz retinde tirkelip, jumyspen qamtýǵa járdemdesýdiń qosymsha sharalaryna qatysa alady. Atap aıtqanda, jańa mamandyq alý úshin kásiptik oqýdan ótýge, sýbsıdııalanatyn jumys oryndaryna ornalasýǵa nemese jumysqa ornalasý múmkindigi joǵary óńirlerge erikti túrde qonys aýdarýǵa bolady, — delingen habarlamada.
Jumysynan aıyrylǵandarǵa áleýmettik tólem
Mindetti áleýmettik saqtandyrý júıesine qatysqan jáne tıisti quqyǵy bar azamattarǵa jumysynan aıyrylýyna baılanysty áleýmettik tólem taǵaıyndalady.
— 2026 jylǵy 1 qazannan bastap pılottyq joba aıasynda bul tólem eń uzaq degende úsh aıǵa taǵaıyndalýy múmkin. Tólem kólemi azamattyń ortasha aılyq tabysyna jáne mindetti áleýmettik saqtandyrý júıesine qatysý uzaqtyǵyna baılanysty esepteledi, — delingen mınıstrlik taratqan aqparatta.
Memlekettik qoldaý jumys usynýmen ǵana shektelmeıdi. Azamat jumysqa ornalasqannan keıin de Mansap ortalyǵy onyń jumyspen qamtylý jaǵdaıyn baqylaýdy jalǵastyrady.
Osylaısha, jumyssyz qalǵan azamat úshin negizgi kezeńder — jumys izdeýshi retinde tirkelý, sáıkes bos jumys oryndaryn qaraý, qajet bolǵan jaǵdaıda qosymsha qoldaý sharalaryna qatysý jáne jumysqa ornalasý.
Buǵan deıin bıyl elordada shtat sanynyń nemese qyzmetkerler sanynyń qysqartylýyna baılanysty 149 uıymnan 547 adam jumystan bosatylǵanyn jazǵanbyz.
