Jumyssyz adam da alıment tóleýge mindetti
ASTANA. KAZINFORM — Alıment óndirý jónindegi atqarýshylyq is júrgizýge erekshe nazar aýdarylady. Óıtkeni alıment boıynsha bereshek kámeletke tolmaǵan balalardyń quqyqtary men zańdy múddelerine tikeleı áser etedi. Bul týraly «Aýmaqtyq ákimshilik tájirıbe bólimi» fılıalynyń aǵa sot oryndaýshysy Dáýren Ońlasyn Astana qalasynyń kommýnıkatsııalar qyzmeti alańynda aıtty.
Onyń aıtýynsha, boryshkerdiń resmı jumysynyń bolmaýy alıment tóleý mindetin toqtatpaıdy.
— Atqarýshylyq is júrgizý jáne sot oryndaýshylarynyń mártebesi týraly» zańda boryshkerdiń jalaqysy bolmaǵan jaǵdaıda alıment óndirý tártibi kózdelgen. Tıisti jaǵdaılarda bereshek mólsheri Qazaqstan Respýblıkasyndaǵy ortasha jalaqyny eskere otyryp aıqyndalady, — dedi ol.
Sondyqtan resmı túrde jumys istemeımin, sol sebepti alıment tóleýge mindetti emespin degen ýáj zań turǵysynan negizsiz.
Spıkerdiń málimetinshe, bul rette sot oryndaýshysy boryshkerdiń naqty tabys kózderin, múlkin, banktik shottaryn, jumys ornyn jáne ózge de aktıvterin anyqtaýǵa tıis.
— Alıment óndirý týraly sot aktisi oryndalmaǵan jaǵdaıda, eger árekette qylmystyq quqyq buzýshylyq belgileri bolmasa, boryshker QR Ákimshilik quqyq buzýshylyq týraly kodeksiniń 669-baby boıynsha ákimshilik jaýaptylyqqa tartylýy múmkin, — dedi ol.
Onyń aıtýynsha, alıment boıynsha mindettemelerdi uzaq ýaqyt oryndamaý qylmystyq jaýaptylyqqa da ákep soǵýy múmkin.
— QR Qylmystyq kodeksiniń 139-babyna sáıkes, ata-ananyń sot sheshimi boıynsha kámeletke tolmaǵan balalaryn asyraýǵa qarajat tóleý jónindegi mindetterin úsh aıdan astam ýaqyt oryndamaýy qylmystyq jaýaptylyqqa negiz bolady, — dedi ol.
Sondaı-aq zańda kózdelgen jaǵdaılarda eńbekke jaramsyz balalaryn, ata-anasyn nemese jubaıyn asyraý jónindegi mindetterdi oryndamaǵany úshin de jaýaptylyq qarastyrylǵan.
Atalǵan áreket úshin 600 saǵatqa deıin qoǵamdyq jumystarǵa tartý, eki jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy kózdelgen.
Budan bólek, tıisti jaǵdaılarda QR Qylmystyq kodeksiniń 430-baby da qoldanylýy múmkin. Alımenttik mindettemelerdi uzaq ýaqyt boıy oryndaýdan jaltarý ákimshilik jaýaptylyqtan qylmystyq jaýaptylyqqa ákelýi yqtımal.
Aıta keteıik, Atqarýshylyq qujatty oryndamaǵan boryshkerge qandaı jaza qoldanylatynyn jazǵanbyz.
