Jumysshylarǵa arnalǵan jańa nagrada paıda bolýy múmkin be
ASTANA. KAZINFORM – QR Eńbek jáne halyqty áleýmettik qorǵaý mınıstrligi eldegi jumysshylarǵa arnalǵan jańa marapattar engizý jóninde túsindirme berdi.
Eńbek mınıstrliginiń habarlaýynsha, Prezıdent Qasym-Jomart Toqaev bıylǵy Joldaýynda «Jumysshy mamandyqtar jylyn» jarııalap, jumysshy kásipteri men túrli sala mamandarynyń bedelin dáıekti túrde arttyrýdy tapsyrǵan.
Joldaýda memlekettik nagradalar júıesine ınjenerler, geologtar, ken oryndaryn ázirleýshiler, kólik, agrarlyq jáne sý salalarynyń qyzmetkerleri, sondaı-aq ǵalymdar men ónertapqyshtar úshin qurmetti ataqtar engizý jóninde jazylǵan.
«Memleket Basshysynyń tapsyrmasyn oryndaý úshin tıisti salalyq memlekettik organdar joǵaryda atalǵan kásipter boıynsha jańa qurmetti ataqtar engizý jóninde usynystar qalyptastyryp, engizedi. Sonymen qatar, Joldaýdy iske asyrý úshin jyl saıyn jalpyulttyq is-sharalar jospary qalyptastyrylady. Jospar jáne tıisti bekitýler bekitilgen soń, memlekettik organdar tıisti jumystardy júrgizedi», - dep túsindirdi mınıstrlik.
Sondaı-aq, qazaqstandyqtar ekonomıkadaǵy, áleýmettik saladaǵy, ǵylymdaǵy, mádenıettegi jáne memlekettik qyzmettegi eńbek jetistikteri úshin «Eren eńbegi úshin» medalimen marapattalady.
Al eńbek adamynyń bedelin arttyrý maqsatynda «Eńbek ardageri» medali men «Qazaqstannyń Eńbek Eri» joǵary erekshelik belgisi bekitilgen. «Eńbek Eri» - Qazaqstan Respýblıkasyn ekonomıkalyq, áleýmettik-gýmanıtarlyq damytýdaǵy asa úzdik jetistikteri úshin beriledi. Al «Eńbek ardageri» medalimen zeınet jasyna tolǵan (salaǵa baılanysty emes), jalpy jumys ótili 40 jyldan asatyn, onyń ishinde bir salada keminde 10 jyl jumys ótili bar, sondaı-aq eńbek qyzmetinde joǵary nátıjelerge qol jetkizgen qyzmetkerler marapattalady.
Sonymen birge, memlekettik organdardyń basqa da vedomstvolyq nagradalary – medaldar men tósbelgiler kózdelgen. Densaýlyq saqtaý salasynda «Densaýlyq saqtaý isiniń úzdigi» tósbelgisimen Densaýlyq saqtaý júıesiniń qyzmetkerleri, sondaı-aq halyqtyń densaýlyǵyn qorǵaý isine erekshe úles qosqan ózge de adamdar marapattalady.
Munaı-gaz salasynda munaı-gaz óndirisiniń tıimdiligin, shyǵarylatyn ónimniń sapasy men básekege qabilettiligin arttyrýǵa, ony álemdik naryqta damytýǵa jáne ónimniń jańa túrlerin jasaýǵa úlken úles qosqan joǵary kásibı qyzmetkerler «Munaı-gaz keshenin damytýǵa qosqan úlesi úshin» medalimen marapattalady.
