Jumysshylar kúızeliste júr: Fınlıandııada qyzmetkerlerdiń jumystan qajý sebepteri ataldy
ASTANA. KAZINFORM — Fınlıandııada jumys isteıtin ár tórtinshi adam kúızeliske ushyraǵan. Bul Fınlıandııanyń Eńbek gıgıenasy ınstıtýty júrgizgen zertteý nátıjesinde anyqtaldy, dep habarlaıdy AZERTADJ.
Mundaı qyzmetkerlerdiń úlesi — 26 paıyz. Qyzmetkerler men basshylar arasynda kásibı kúızelis belgileri COVID-19 pandemııasyna deıingi kezeńmen salystyrǵanda jıirek kezdesedi.
Mamandar kásibı kúıip ketýdiń negizgi sebepteri retinde bıýrokratııalyq talaptar men jumys mindetterine qatysty qaıshylyqtardy atady. Sonymen qatar qyzmetkerlerdiń jaǵdaıyna belgisizdik, shamadan tys jumys júktemesi, birsaryndy eńbek jáne fızıkalyq turǵydan aýyr jumys áser etedi.
Sonymen birge eldegi eńbekke qabilettiliktiń jalpy kórsetkishi jaqsarǵan. Bıyl jazda fınlıandııalyq jumysshylardyń 43 paıyzy óz eńbekke qabilettiligin óte jaqsy dep baǵalaǵan. Byltyr bul kórsetkish 39 paıyz bolǵan. Al shamamen 67 paıyzy jumysynyń fızıkalyq talaptaryn tolyq oryndaı alatynyn aıtqan.
Zertteý jas erekshelikterine baılanysty aıyrmashylyqtardyń bar ekenin de kórsetti. Jas qyzmetkerlerdiń dene jáne oı eńbegine qabileti orta eseppen joǵary bolǵanymen, jumystyń áleýmettik qyrlaryna beıimdelýde kóbirek qıyndyq kóredi.
30 jasqa tolmaǵan qyzmetkerlerdiń jartysynan astamy óz eńbekke qabilettiligin óte jaqsy dep baǵalaǵan. Alaıda jastar arasynda jumysqa degen qyzyǵýshylyqtyń tómendeýi, zerigý jáne jalǵyzdyq sezimi jıirek baıqalady.
Buǵan deıin qazaqstandyq psıholog zýmerlerdi kúızeliske túsiretin basty sebepti atady.
