Jumysshylar aldynda jalaqy qaryzy kóp óńirler anyqtaldy

ASTANA. KAZINFORM – Jyl basynan beri jalaqysyn ýaqytynda almaǵan 10 myń jumysshynyń quqyǵy qorǵaldy.

- Jyl basynan beri memlekettik eńbek ınspektorlary 2 mlrd 300 mln teńge mólsherinde jalaqy qaryzyn anyqtady. Búginde onyń 2 mlrd 100 mln teńgesin jumys berýshiler qyzmetkerlerine tóledi. Osylaısha shamamen 10 myń jumysshynyń quqyǵy qorǵaldy. Azdaǵan qaldyq qaryz qaldy, olardy belgilengen merzim ishinde óteý qajet. Biz jumysshy aldyndaǵy barlyq bereshekti mindetti túrde tolyq óteýge qol jetkizemiz. Bul másele – jumysymyzdaǵy basym baǵyttardyń biri, - dedi Eńbek jáne halyqty áleýmettik qorǵaý mınıstrligi memlekettik eńbek ınspektsııasy komıtetiniń tóraǵasy Meırambek Ahmetov ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq Eńbek mınıstrliginiń ókili jalaqyny jıi keshiktiretin óńirlerdi atady.

- Óńirler boıynsha eń kóp kórsetkish Almaty oblysynda (190 mln teńge) jáne Shyǵys Qazaqstan oblysynda (140 mln teńge) tirkelgen. Úshinshi orynda Astana qalasy (124 mln teńge). Keıde bir aı ishinde, keıde 2–3 aı ishinde ótep jatady. Uzaq ýaqyt boıy tólenbegen jaǵdaıda problemalyq kásiporyn sanalady. Olar, ádette, bankrot nemese bankrot bolǵaly turǵan, bolmasa qaıta qalpyna keltirý rásiminde júrgen kásiporyndar. Kóp jaǵdaıda olardyń esepshottary buǵattalǵan, múlki joq, ıaǵnı tóleıtin qarjysy joq. Osyndaı jaǵdaılar kezdesedi. Al qalypty jumys istep turǵan kásiporyndar, qaryz bolǵan jaǵdaıda ony jyldam jabýǵa tyrysady, - dep túsindirdi komıtet tóraǵasy.

Aıta keteıik, qazan aıynda otandyq eńbek naryǵynda jumysqa suranys pen usynys teńesip, áleýmettik sektor kósh bastady.